ანკარაში საქართველოს პარლამენტის თავმჯდომარემ, დავით ბაქრაძემ და ევროპის საბჭოს საპარლამენტო ასამბლეის პრეზიდენტმა, თურქეთის პარლამენტის წევრმა, მევლუთ ჩავუსოღლუმ საქართველოს წინაშე არსებულ პრობლემატიკაზე ისაუბრეს,  კერძოდ, რუსეთ-საქართველოს ურთიერთობებზე და ოკუპირებულ ტერიტორიებზე.

საქართველოს პარლამენტის თავმჯდომარე დავით ბაქრაძე თურქეთის რესპუბლიკაში ოფიციალური ვიზიტით იმყოფება. დღეს მან შეხვედრები გამართა თურქეთის პარლამენტში. შეხვედრის დაწყებამდე დავით ბაქრაძემ ათათურქის მავზოლეუმი მოინახულა და ათათურქის საფლავი გვირგვინით შეამკო. თურქეთში პარლამენტის თავმჯდომარესთან ერთად პარლამენტის წევრები აკაკი მინაშვილი, გიორგი თორთლაძე და თურქეთის პარლამენტთან მეგობრობის ჯგუფის ხელმძღვანელი დილარ ხაბულიანი იმყოფება.

პარლამენტის წევრი გურამ ჩახვაძე დღევანდელ ბრიფინგზე სასაქონლო ზედნადების შემოღებასთან დაკავშირებით მცირე მეწარმეებში წარმოქნილ უკმაყოფილებას გამოეხმაურა. დეპუტატის განცხადებით, ამგვარი საკანონმდებლო ნორმები ხელს უშლის ქვეყანაში ეკონომიკურად თავისუფალი და სტაბილური საშუალო ფენის ჩამოყალიბებას.

თბილისის საზღვრებში და მიმდებარე ტერიტორიაზე არსებული სახელმწიფო ტყის ფონდის მიწებიდან შესაძლებელი გახდება ტყის ფონდის მიწების ამორიცხვა, თუ საქართველოს კონსტიტუციური შეთანხმებით გათვალისწინებული მიზნებისთვის განხორციელდება ავტოკეფალური ეკლესიისთვის მიჩენილი უბნების გამოყოფა.

"მთავრობის სარეზერვო ფონდიდან სამცხე-ჯავახეთსა და შიდა ქართლში მცხოვრებ გლეხს ყოველ კილოგრამ ვაშლზე დანამატის სახით 10 თეთრი უნდა მიეცეს", – ამ მოთხოვნით ფრაქცია "ქრისტიან–დემოკრატების" წევრმა, ლევან ვეფხვაძემ ქვეყნის მთავრობას მიმართა.

საქართველოს პარლამენტის თავმჯდომარე, საპარლამენტო დელეგაციასთან ერთად 9–12 თებერვალს თურქეთის რესპუბლიკას ეწვევა. დავით ბაქრაძე ანკარაში შეხვედრებს გამართავს ქვეყნის პემიერ-მინისტრთან, რეჯეფ თაიფ ერდოღანთან, დიდი ეროვნული კრების(პარლამენტის) თავმჯდომარესთან, მეჰმეთ ალი შაჰინთან და ევროსაბჭოს საპარლამენტო ასამბლეის პრეზიდენტთან, მევლუთ ჩავუსოღლუსთან.

პარლამენტის თავმჯდომარემ, დავით ბაქრაძემ  ბიუროს წევრებს და საქართველოს მოსახლეობას დავით აღმაშენებლის ხსენების  დღე და  სახელმწიფო უნივერსიტეტის  დაარსების დღე მიულოცა.

საქართველოს მთავრობის მიერ საკანონმდებლო ინიციატივის წესით წარმოდგენილი "ზოგადი განათლების შესახებ", "უმაღლესი განათლების შესახებ”, "მეცნიერების, ტექნოლოგიების და მათი განვითარების შესახებ"  საქართველოს  კანონში ცვლილებებისა და დამატებების შეტანის თაობაზე კანონპროექტები განიხილეს დღეს განათლების, მეცნიერებისა და კულტურის კომიტეტის სხდომაზე. 

პარლამენტის წევრი, გიორგი ცაგარეიშვილი წერილით მიმართავს პარლამენტის თავმჯდომარეს, დავით ბაქრაძეს, რომ საქართველოს პრეზიდენტის ყოველწლიური მოხსენებით გამოსვლის შემდეგ მას, გამონაკლისის სახით, დებატებში გამოსვლის ნება დართოს. საქართველოს პარლამენტის რეგლამენტის თანახმად, პრეზიდენტის მოხსენების შემდეგ ფრაქციების თავმჯდომარეები გამოდიან.

ქართული დასის ლიდერი ჯონდი ბაღათურია ანტიკრიზისული საბჭოს საგანგებო სხდომის მოწვევას ითხოვს.  პარლამენტში ახალგორის დევნილებთან ერთობლივად გამართულ პრესკონფერენციაზე ბაღათურიამ განაცხადა, რომ ამერიკის, გერმანიისა და საფრანგეთის მთავრობებმა დევნილებს მილიონები გამოუყო, იმისათვის რომ მათთვის საცხოვრებელი კოტეჯები აეშენებინათ ან კომპესაციის სახით 10 ათასი დოლარი გადაეცათ, თუმცა  ახალგორიდან დევნილ 150 ოჯახს სახელმწიფოსგან ჯერჯერობით არაფერი მიუღიათ.

თორმეტიდან თოთხმეტ წლამდე ასაკის პირების სისხლისსამართლებრივი პასუხისმგებლობის საკითხები ახლებურად დარეგულირდება. სისხლის სამართლის კოდექსში შესატანი ცვლილებების თანახმად, თორმეტიდან თოთხმეტ წლამდე არასრულწლოვანთა სისხლისსამართლებრივი პასუხისმგებლობის ასაკად განისაზღვრება თოთხმეტი წელი. საქართველოს მთავრობის მიერ წარმოდგენილი კანონპროექტთა პაკეტი ასევე ითვალისწინებს არასრულწლოვანებისთვის გარკვეული შეღავათების დაწესებას.

დაზღვევის შესახებ კანონში ცვლილებები შედის. ამის თაობაზე დღეს ჯანმრთელობის დაცვისა და სოციალურ საკითხთა კომიტეტის სხდომაზე იმსჯელეს. ცვლილება "უკანონო შემოსავლის ლეგალიზაციის აღკვეთის ხელშეწყობის შესახებ" კანონპროექტიდან გამომდინარეობს, რომლის მიღების აუცილებლობა საქართველოს მიერ ფინანსური ქმედებების სპეციალური ჯგუფის (FATF) და ევროსაბჭოს ფულის გათეთრების საწინააღმდეგო რჩეულ ექსპერტთა კომიტეტის (MONEYVAL) რეკომენდაციების შესრულების საჭიროებამ განაპირობა.

სისხლის სამართლის კოდექსის ლიბერალიზაციის მიზნით მასში მნიშვნელოვანი ცვლილებები შედის. საკითხი ეხება სისხლის სამართლებრივი პასუხისმგებლობის მინიმალური ასაკობრივი ზღვრის 12 წლიდან 14 წლამდე გაზრდას. ამის შესახებ მთავარმა პროკურორმა მურთაზ ზოდელავამ ადამიანის უფლებათა დაცვისა და სამოქალაქო ინტეგრაციის კომიტეტის დღევანდელ სხდომაზე განაცხადა.

სახელმწიფო ზედამხედველობის და კონტროლის გზით მომეტებული ტექნიკური საფრთხისაგან ადამიანის სიცოცხლისა და ჯანმრთელობის, საკუთრებისა და  გარემოს დაცვას, ასევე ტექნიკური საფრთხის შემცველი ობიექტების ექსპლოატაციის, მათთან დაკავშირებული შრომის პროცესისა და პირობების უსაფრთხოების წესებთან შესაბამისობის უზრუნველყოფას ისახავს მიზნად  საქართველოს მთავრობის მიერ საკანონმდებლო ინიციატივის წესით წარმოდგენილი კანონპროექტი  "ტექნიკური საფრთხის კონტროლის შესახებ", რომელიც პირველი მოსმენით განიხილა დარგობრივი ეკონომიკისა და ეკონომიკური პოლიტიკის კომიტეტმა დღევანდელ სხდომაზე.

უცხოეთში მცხოვრებ თანამემამულეებთან ურთიერთობის კომიტეტის თავმჯდომარე, ნუგზარ წიკლაური რუსეთში ქართული დიასპორის წარმომადგენლებს, თამაზ ბერიძეს და ჯონი შამათავას შეხვდა, რომლებიც სანკტ–პეტერბურგში მოქმედი ქართველთა სათვისტომო "იბერიას" აქტიური წევრები იყვნენ.

"საერთაშორისო სავალუტო ფონდში მონაწილეობისა და ხმის მიცემის უფლების გაზრდის შესახებ” და "საერთაშორისო სავალუტო ფონდის საინვესტიციო უფლებამოსილების გაფართოების შესახებ” საერთაშორისო სავალუტო ფონდის სადამფუძნებლო შეთანხმებში შესატან ცვლილებებზე იმსჯელეს დღეს საგარეო ურთიერთობათა კომიტეტის სხდომაზე.

პარლამენტის ვიცე–სპიკერის, ფრაქცია "ქრისტიან-დემოკრატების” წევრის, ლევან ვეფხვაძის განცხადებით, საარჩევნო სიების გადამოწმებისთვის თითო პოლიტიკური პარტიისთვის გათვალისწინებული თანხა, პროცესის სრულყოფილად წარმართვისთვის არასაკმარისია.

"საქართველოში სამართლიანი, გამჭვირვალე და დემოკრატიული არჩევნები ჩატარდება", – განაცხადა დავით ბაქრაძემ ცესკოს თავმჯდომარესთან შეხვედრის შემდეგ.  შეხვედრაზე ცესკოს ინიციატივებზე და  სამუშაო ჯგუფის შექმნის თაობაზე ისაუბრეს. სამუშაო ჯგუფი ოპოზიციური პარტიების წარმომადგენლებისგან დაკომპლექტდება და კოორდინირებას გაუწევს საარჩევნო სიების გადამოწმების პროცესს.

მთავრობამ გაითვალისწინა პარლამენტის შენიშვნები და საფინანსო–საბიუჯეტო კომიტეტის დღევანდელ სხდომაზე „შემოსავლების სამსახურის შესახებ“ კანონპროექტის შეთანხმებული ვარიანტი წარმოადგინა. კანონპროექტი მეორე მოსმენით განიხილეს.