პარლამენტის წევრის, გიორგი ცაგარეიშვილის განცხადებით, კონსტიტუციური კანონპროექტის გამოქვეყნებისა და მისი საყოველთაო-სახალხო განხილვის კომისიას  საზოგადოება შეცდომაში შეჰყავს, როდესაც აცხადებს, რომ კონსტიტუციის ახალი პროექტი ნახევრად საპრეზიდენტო მოდელია. 

შრომის, ჯანმრთელობისა და სოციალური დაცვის სამინისტროს სტრუქტურული რეორგანიზაციის აუცილებლობაზე ისაუბრა დღევანდელ ბრიფინგზე ფრაქცია "ქრისტიან-დემოკრატების" მდივანმა, მაგდა ანიკაშვილმა. მას მიაჩნია, რომ უნდა ჩამოყალიბდეს ორი დამოუკიდებელი უწყება: ჯანდაცვის სამინისტრო და ოჯახის, დასაქმებისა და სოციალური დაცვის სამინისტრო.

კონსტიტუციური კანონპროექტის გამოქვეყნებისა და მისი საყოველთაო-სახალხო განხილვის საორგანიზაციო კომისიის წევრები სახალხო  დამცველთან არსებული ეროვნული უმცირესობების საბჭოს წარმომადგენლებს შეხვდნენ. განხილული იქნა კონსტიტუციაში შესატანი ძირითადი ცვლილებები.

ფრაქცია "ქრისტიან-დემოკრატები" სასკოლო ინვენტარის დეფიციტის გამომწვევი მიზეზების გასარკვევად ფრაქციის უახლოეს სხდომაზე ფინანსთა მინისტრის, კახა ბაინდურაშვილის მოწვევას ითხოვენ. ამ საკითხთან დაკავშირებით, ფრაქციის თავმჯდომარემ, გიორგი ახვლედიანმა, დღეს ბრიფინგი გამართა.

ახალგორში ქართული ენის სწავლების აკრძალვა გააპროტესტა პარლამენტის თავმჯდომარის მოადგილემ, პაატა დავითაიამ და ამ საკითხს სპეციალური ბრიფინგი მიუძღვნა.

საკონსტიტუციო კომისიამ კონსტიტუციური კანონპროექტის  საყოველთაო-სახალხო განხილვის ფარგლებში მორიგი შეხვედრა საქართველოს ტექნიკური უნივერსიტეტში, უნივერსიტეტის პროფესორ-მასწავლებლებთან გამართა. შეხვედრაში მონაწილეობა მიიღო საქართველოს პარლამენტის თავმჯდომარემ, საყოველთაო-სახალხო  განხილვის საორგანიზაციო კომისიის თავმჯდომარემ, დავით ბაქრაძემ. მან შეკრებილ საზოგადოებას  კონსტიტუციაში შესატანი ძირითადი ცვლილებები გააცნო.

კონსტიტუციის ახალ რედაქციაში   თვითმმართველობის ორგანოებთან დაკავშირებით ახალი თავი გაჩნდა. ამ თემაზე სასაუბროდ საკონსტიტუციო კომისიის წევრები,   ადგილობრივი თვითმმართველობების ეროვნული ასოციაციის წარმომადგენლები, მუნიციპალიტეტების და საკრებულოების წევრები შიკრიბნენ.

საქართველოს საპატრიარქოსა და  სრულიად საქართველოს კათოლიკოს–პატრიარქის, მისი უწმინდესობისა და უნეტარესობის, ილია მეორის ინიციატივას ახალი სოფლებისათვის ეკლესიის კუთვნილი მიწების გადაცემის შესახებ,  დღეს გამართულ ბრიფინგზე საპარლამენტო უმცირესობის ლიდერი გიორგი თარგამაძე  გამოეხმაურა.

ანტიკრიზისული საბჭოს დღევანდელ სხდომაზე საბჭოს წევრები პრემიერ-მინისტრს, ნიკა გილაურს ელოდებოდნენ.  სხდომა დევნილებთან დაკავშირებით სახელმწიფო სტრატეგიას ეხებოდა. პრემიერის გამოუცხადებლობამ საბჭოს წევრების უკმაყოფილება გამოიწვია.

საქართველოს პარლამენტის თავმჯდომარე დავით ბაქრაძე 14 სექტემბერს  აშშ-ში მიემგზავრება. იგი იქნება ერთ-ერთი მთავარი მომხსენებელი დემოკრატიულ სახელმწიფოთა თანამეგობრობის ფორუმზე  (Community of Democracies). დემოკრატიულ სახელმწიფოთა თანამეგობრობის ფორუმი არის დემოკრატიული ქვეყნების სამთავრობათაშორისო გლობალური კოალიცია, რომლის ძირითადი მიზანია დემოკრატიული პრიცნიპების, ნორმების და ინსტიტუტების გაძლიერება მსოფლიოში. ამ კოალიციაში გაერთიანებულია 100-ზე მეტი სახელმწიფო.

პარლამენტის თავმჯდომარის მოადგილემ, პაატა დავითაიამ ანტიკრიზისული საბჭოს სხდომის დანიშვნა და მასზე პრემიერ-მინისტრის, ნიკოლოზ გილაურის მოწვევა მოითხოვა. დავითაიას განცხადებით, პრემიერ-მინისტრმა  საბჭოს უნდა აუხსნას, რატომ არ ხორციელდება სახელმწიფო სტრატეგია დევნილებთან დაკავშირებით და რატომაა ხელისუფლების მიდგომა მათ მიმართ არაჰუმანური.

"აფხაზების და ცხინვალის რეგიონში მცხოვრები ოსების მომავალი მხოლოდ და მხოლოდ საქართველოსთან არის დაკავშირებული და ეს ხალხი ამაზე უნდა დაფიქრდეს” - განაცხადა პარლამენტის თავმჯდომარის მოადგილემ, პაატა დავითაიამ დღევანდელ ბრიფინგზე, რომელიც რუსეთის ფედერაციის მხრიდან აფხაზეთისა და სამხრეთ ოსეთის უკანონო აღიარების ორი წლისთავთან დაკავშირებით გამართა.

საქართველოს პარლამენტის თავმჯდომარის მოადგილემ, რუსუდან კერვალიშვილმა გაეროს ქალთა ფონდთან (UNIFEM) ერთად გამართა საკონსულტაციო შეხვედრა გაეროს უშიშროების საბჭოს რეზოლუცია 1325-ის "ქალებზე, მშვიდობასა და უსაფრთხოებაზე" თემაზე.

ახალი საკონსტიტუციო პროექტის განხილვა ფოთში, სავაჭრო–სამრეწველო პალატის წევრებთან, ბიზნესმენებთან და საზოგადოების წარმომადგენლებთან გაიმართა. ქვეყნის უზენაესი კანონი დამსწრეებს პარლამენტის თავმჯდომარემ, დავით ბაქრაძემ და საყოველთაო–სახალხო განხილვის საორგანიზაციო კომისიის წევრებმა გააცნეს.

კონსტიტუციის კანონის პროექტის განხილვა ამჯერად თელავში, იაკობ გოგებაშვილის სახელობის სახელმწიფო უნივერსიტეტში გაიმართა. ქვეყნის უზენაესი კანონი უნივერსიტეტის სტუდენტ-პროფესურას და ადგილობრივ მოსახლეობას პარლამენტის თავმჯდომარემ, დავით ბაქრაძემ და საყოველთაო–სახალხო განხილვის საორგანიზაციო კომისიის წევრებმა გააცნეს.