მიხეილ ყაველაშვილი ჭიდაობის ეროვნული ფედერაციის პრეზიდენტს შეხვდა

07 თებერვალი 2019
მიხეილ ყაველაშვილი ჭიდაობის ეროვნული ფედერაციის პრეზიდენტს შეხვდა

სპორტისა და ახალგაზრდულ საქმეთა კომიტეტის თავმჯდომარე, მიხეილ ყაველაშვილი ჭიდაობის ეროვნული ფედერაციის პრეზიდენტს, გეგა (თამაზ) გეგეშიძეს შეხვდა.

შეხვედრაზე მხარეებმა ჭიდაობის ფედერაციაში არსებული დაპირისპირების მოგვარების გზებზე იმსჯელეს და კონკრეტული გადაწყვეტილება მიიღეს.

მიხეილ ყაველაშვილმა შეხვედრის დასრულების შემდეგ კომენტარი გააკეთა და აღნიშნა, რომ უახლოეს პერიოდში ჭიდაობის ფედერაციის გაფართოებული პრეზიდიუმის სხდომა გაიმართება, რომელზეც მოჭიდავეები და სპორტსმენები ფედერაციაში არსებულ საკითხებთან დაკავშირებით მსჯელობას და დისკუსიას გამართავენ.

„ჭიდაობის ფედერაციამ წლის საუკეთესო ფედერაციის ტიტული მოიპოვა და სხვადასხვა ტურნირებში არაერთი ჩემპიონი და წარმატებული მოჭიდავე გვყავს. ეს ტენდენცია უნდა გაგრძელდეს და მთავარი მოტივია სტაბილურად განვითარდეს როგორც სპორტსმენების წარმატებები, ასევე ფედერაციის საქმიანობა. რაც შეეხება იმ არასასიამოვნო ინციდენტს, რომელიც საზოგადოებისთვის ცნობილია, დარწმუნებული ვარ, იგი არავის ინტერესში შედიოდა, თუმცა სამწუხაროა, რომ აღნიშნული ფაქტი მოხდა. როგორც ზურაბ დათუნაშვილთან, ასევე გეგა გეგეშიძესთან აღნიშნულ ინციდენტზე გულწრფელად ვისაუბრეთ. შემომთავაზეს, რომ ჭიდაობის ფედერაცია, უახლოეს დღეებში, ფართო შემადგენლობით მოიწვევს პრეზიდიუმს და ის ადამიანები, ვინც ქმნიდნენ ჭიდაობის ეპოქას, ვეტერანი სპორტსმენები და მოქმედი მოჭიდავეები ისმჯელებენ ყველა იმ საკითხზე, რაც ფედერაციაშია შექმნილი. ჩემთვის მნიშვნელოვანია, რომ იმ სფეროში გადაწყდეს და მოგვარდეს პრობლემები და ფედერაციის შიგნით, მსჯელობის და დისკუსიის შედეგად იქნეს მიღებული გადაწყვეტილება. კიდევ ერთხელ მინდა აღნიშნო, რომ მთავარია ის წარმატებები, რომლებიც გვქონდა, კვლავ გაგრძელდეს და არც ერთი მოჭიდავე არ იყოს დაჩაგრული და ყველა სპორტსმენს ჰქონდეს სრულყოფილად მომზადების და ასპარეზობის საშუალება. ეს არის ყველა ჩვენგანის საერთო საკეთებელი საქმე“, - განაცხადა მიხეილ ყაველაშვილმა.

ზურაბ დათუნაშვილთან მომხდარ ინციდენტთან დაკავშირებით, ჭიდაობის ეროვნული ფედერაციის პრეზიდენტმა სინანული გამოთქვა და მოჭიდავეს, ლიცენზიების მოპოვების მიზნით, ვარჯიშის გაგრძელება შესთავაზა.

„კომიტეტის თავმჯდომარესთან გამართულ შეხვედრაზე დეტალურად განვიხილეთ არსებული ვითარება. შევჯერდით, რომ ჩატარდება პრეზიდიუმის სხდომა და ყველა საკითხზე კონკრეტულ გადაწყვეტილებებს მივიღებთ. რაც შეეხება მომხდარ ფაქტს, ვნანობ აღნიშნულ ინციდენტს და ახლა მთავარია ვითარების დასტაბილურება, რადგან ოლიმპიური ლიცენზიების მოპოვების წელია და სპორტსმენმა უნდა გააგრძელოს ვარჯიში“, - აღნიშნა გეგა გეგეშიძემ.

გალერეა

  • მიხეილ ყაველაშვილი ჭიდაობის ეროვნული ფედერაციის პრეზიდენტს შეხვდა, 2019 წლის 7 თებერვალი
  • მიხეილ ყაველაშვილი ჭიდაობის ეროვნული ფედერაციის პრეზიდენტს შეხვდა, 2019 წლის 7 თებერვალი