პარლამენტის პლენარული სხდომა

23 თებერვალი 2018
პარლამენტის პლენარული სხდომა

პარლამენტის დღევანდელმა პლენარულმა სხდომამ მუშაობა დღის წესრიგით განსაზღვრული საკითხების განხილვით გააგრძელა.

პარლამენტმა იმსჯელა საპარლამენტო უმცირესობაში შემავალი ფრაქციების: „ევროპული საქართველო“, „მოძრაობა თავისუფლებისთვის-ევროპული საქართველო“ და „მოძრაობა თავისუფლებისთვის-რეგიონების“ მიერ ინიცირებული დადგენილების პროექტზე, რომელიც აზერბაიჯანელ ჟურნალისტ აფგან მუხთარლიზე თავდასხმის, მისი გატაცების, თავისუფლების უკანონო აღკვეთისა და საქართველოს სახელმწიფო საზღვარზე უკანონოდ გადაყვანის ფაქტის შემსწავლელი დროებითი საგამოძიებო კომისიის შექმნის მიზანშეწონილობის საკითხს ეხება. პროექტი კოლეგებს საპარლამენტო უმცირესობის წევრმა ელენე ხოშტარიამ გააცნო. 

ელენე ხოშტარიას განცხადებით, საკითხი პარტიულ ოპონირებას სცილდება და მომხდარის დადგენა სახელმწიფოებრივად მნიშვნელოვანია, ხელისუფლების ინტერესში უნდა იყოს კომისიის შექმნა, რომელიც ყველა კითხვას გასცემს პასუხს, რაც აზერბაიჯანელი ჟურნალისტის საკითხს უკავშირდება. მისი შეფასებით, კომისიის შექმნას პოლიტიკური და საერთაშორისო მნიშვნელობა აქვს. ელენე ხოშტარიას თქმით, კომისიის შექმნა ეს იქნება პარლამენტის გზავნილი, რომ პარლამენტი საპარლამენტო კონტროლის ფუნქციას იღებს თავის თავზე.

მომხსენებელმა ასევე უპასუხა პარლამენტის წევრების კითხვებს, რის შემდეგაც ცალკეულმა დეპუტატებმა, ფრაქციების წარმომადგენელებმა განსახილველ საკითხთან დაკავშირებით თავიანთი პოზიცია გამოხატეს.

საპარლამენტო უმრავლესობის წევრების განცხადებით, დადგენილების პროექტის თუნდაც სათაური იმთავითვე მიუთითების ოპოზიციის წინასწარ განწყობასა და გეგმაზე, დამოკიდებულებაზე, თუ რა შედეგი სურს მიიღოს ოპოზიციამ ამ საგამოძიებო კომისიის შექმნით. ის ფაქტი კი, რომ კომისიის შექმნა ოპოზიციამ თავიდანვე მოითხოვა და არ დაელოდა გამოძიების დასრულებას, უმრავლესობის წევრების აზრით, მიუთითებს იმაზე, რომ ოპოზიციისთვის ეს უფრო პოლიტიკური და პარტიული საკითხია და არა ადამიანის უფლებების დაცვაზე წუხილი.

თავის მხრივ, საპარლამენტო უმცირესობის წევრებმა გამოთქვეს მზადყოფნა შეიცვალოს კომისიის სახელწოდება იმ შემთხვევაში, თუკი მიღებული იქნება გადაწყვეტილება მისი შექმნის შესახებ.

„მინდა გაგახსენოთ 2017 წლის 15 ივნისის ევროპარლამენტის რეზოლუცია, რომელშიც ევროპარლამენტმა საქართველოს ხელისუფლებას მოუწოდა, რომ უზრუნველეყო მყისიერი, სიღრმისეული, გამჭვირვალე და ეფექტური გამოძიება. აქვე ევროპარლამენტმა თქვა, რომ მას მიაჩნია, რომ ძალიან მნიშვნელოვანია, საქართველოს ხელისუფლებამ ყველაფერი იღონოს, გაიღოს ყველა ძალისხმევა, რათა გაარკვიოს, ნათელი მოჰფინოს, საქართველოს სახელმწიფოს წარმომადგენლები მონაწილეობდნენ თუ არა ამ გაუჩინარებაში. მე მიმაჩნია, რომ ყველაზე კარგი გზაა, საქართველოს სახელმწიფოს მხრიდან, და განსაკუთრებით, პარლამენტის მხრიდან, რომ ეს გამოძიება იყოს სიღრმისეული, გამჭვირვალე და ეფექტური. ყველაზე კარგი გზა არის, რომ შეიქმნას ეს დროებითი საგამოძიებო კომისია, მიუხედავად იმისა, სათაური მას რა ერქმევა“, - განაცხადა საპარლამენტო უმცირესობის წარმომადგენელმა, პარლამენტის თავმჯდომარის მოადგილემ სერგი კაპანაძემ.

ფრაქცია „ქართული ოცნების“ თავმჯდომარე მამუკა მდინარაძის შეფასებით, ოპოზიციის მხრიდან წარმოდგენილი ყველა არგუმენტი იყო პოლიტიკური. „ამ საქმეში კითხვის ნიშნები მართლაც არსებობს, აქ დაგეთანხმებით, ამ კითხვებს მართლა უნდა გაეცეს პასუხი, საზოგადოებას კითხვები აქვს, არის გარკვეული ვერსიებიც, ეჭვებიც, მაგრამ არა ისე, როგორც თქვენ ჩაწერეთ სათაურში და ტენდენცია აქ გამოჩნდა, სწორედ ამას ვსაუბრობდით. როდესაც მე წარმომდგენს ვეკითხებოდი იმის შესახებ, რომ რას გააკეთებს კომისია განსხვავებულს პროკურატურისგან, აქაც, სამწუხაროდ, პოლიტიკური პასუხები მოვისმინეთ. ვერ მოვისმინეთ სამართლებრივი პროცედურა, რა სამართლებრივი მექანიზმებით, პროცედურებით და საპროცესო მოქმედებებით უნდა მივიდეთ რაღაც შედეგამდე”, - მიმართა მამუკა მდინარაძემ ოპოზიციას, რომელიც მისი შეფასებით, მხოლოდ და მხოლოდ პოლიტიკური არგუმენტებით საუბრობს.

„მე სამართლებრივი არგუმენტები, შესაბამისი პროცედურების დაცვით, როგორ უნდა მივიდეთ კონკრეტულ შედეგამდე, დღეს არ მომისმენია. შესაძლებელია, ვიღაცამ თანხმობა განაცხადოს თქვენს წინადადებაზე, შესაძლებელია ვიღაც წინააღმდეგი იყოს, ვიღაცამ თავი შეიკავოს, მაგრამ რეალობა არის ეს. აქედან გამომდინარე, ვფიქრობ, რომ მაინცდამაინც რეალურად და ობიექტურად რომ ვთქვა, მყარი არგუმენტები ამ კომისიის შესაქმნელად არ ყოფილა, თორემ კითხვის ნიშნები რომ არსებობს და ამაზე პასუხი უნდა გასცეს სახელმწიფომ, საგამოძიებო ორგანოებმა, ეს უდავოა“, - განაცხადა მამუკა მდინარაძემ.

საკითხის განხილვის დასასრულს კოლეგებს მიმართა საპარლამენტო უმრავლესობის ლიდერმა არჩილ თალაკვაძემ და აღნიშნა, რომ მისასალმებელია ის კონსტრუქციული გარემო, რომელშიც ამ საკითხის განხილვა მიმდინარეობს და რა თქმა უნდა, პარლამენტს აქვს ლეგიტიმური ინტერესი, რომ თვალი მიადევნოს ამ საკითხზე გამოძიების პროცესს.

„აუცილებლად უნდა გავიხსენოთ, რომ თქვენ საგამოძიებო კომისიის შექმნის ინიციატივა დააყენეთ თავდაპირველად მაშინვე და არ დაელოდეთ ელემენტარულად გამოძიებას, შესაბამისად, თქვენი ის არგუმენტი, რომელსაც დღეს ამბობთ, რომ გამოძიებამ ვერაფერი ვერ დაადგინა და ახლა დროა შევქმნათ საგამოძიებო კომისია, მინიმუმ არაგულწრფელია, იმიტომ რომ თქვენ თავიდანვე მოითხოვეთ საგამოძიებო კომისიის შექმნა, რაც იყო პირველი სიგნალი იმის, რომ თქვენთვის ეს უფრო მეტად პოლიტიკური და თქვენი პარტიული საკითხია, ვიდრე ადამიანის უფლებათა დაცვის შესახებ რაიმე წუხილი“, - განაცხადა არჩილ თალაკვაძემ.

იგი გამოძიების საკითხსაც შეეხო: „რაც შეეხება თვითონ გამოძიებას. აქ არის კიდევ ერთი პრობლემა, რაც დავინახეთ თქვენს გამოსვლებში - ეს არის მტკიცებით საუბარი იმაზე, რაზეც ამბობთ, რომ უნდა გამოვიძიოთ და დავადგინოთ. ერთი მხრივ, თქვენ ამბობთ, მოდით გამოვიძიოთ, დავადგინოთ რა ხდება. მეორე მხრივ, თქვენ, მტკიცებით ფორმაში საუბრობთ იმაზე, რის გამოძიებასაც გეგმავთ. მრჩება შთაბეჭდილება, რომ თქვენ უკვე იცით რის თქმასაც აპირებთ ამ საგამოძიებო კომისიის ფარგლებში და ეს წინასწარ გაქვთ უკვე დაგეგმილი, რაც ბუნებრივია იმის ნდობას, რომ თქვენთან ერთად ამ საკითხზე საგამოძიებო კომისიის შექმნით ჩვენ გავალთ იმ საერთო შედეგზე, იმ საჯარო ინტერესის პასუხებზე, რაზეც ჩვენ ერთად ვსაუბრობთ პარლამენტში, ამცირებს ნდობას ამ დეკლარაციის მიმართ“, - აღნიშნა მან.

საპარლამენტო უმრავლესობის ლიდერის განცხადებით, ის, რომ აფგან მუხთარლის საქმეზე მიმდინარე გამოძიება სწრაფად ვერ სრულდება, არაა საქართველოს საგამოძიებო ორგანოების ბრალი, ვინაიდან დასაკითხ სუბიექტზე ხელმისაწვდომობა ამ ეპატზე უზრუნველყოფილი არ არის.

არჩილ თალაკვაძის თქმით, ეს შეზღუდვა პრობლემას შეუქმის პარლამენტის საგამოძიებო კომისიასაც. მისი ინფორმაციით, ყველა საგამოძიებო მოქმედება, გარდა სუბიექტის დაკითხვისა, განხორციელებულია და ამ მიმართულებით საკმაოდ მასშტაბური სამუშაოა გაწეული.

„ჩვენ ვფიქრობთ, რომ მიმდინარე გამოძიებას ჯერ არ ამოუწურავს თავისი დრო და რესურსი და ვფიქრობთ, როდესაც ეს დრო და რესურსი ამოიწურება, მიმდინარე გამოძიების ფარგლებში, შემდგომ შესაძლოა, პარლამენტში დავუბრუნდეთ ამ საკითხის და საპარლამენტო კომისიის საკითხის განხილვას. შესაბამისად, ამ საკითხის განხილვასთან დაკავშირებით, ბუნებრივია, პარლამენტი და საპარლამენტიო უმრავლესობა ინარჩუნებს მაღალ ინტერესს, ჩვენ თვალს მივადევნებთ გამოძიების მიმდინარეობას და თვალს მივადევნებთ იმასაც, რომ პასუხები შეკითხვებზე საზოგადოებამ და პარლამენტის წევრებმა მიიღონ“, - განაცხადა არჩილ თალაკვაძემ და იმედი გამოთქვა, რომ „გამოძიება დროს და იმ რესურსებს, რაც მის ხელთ არის, მაქსიმალურად გამოიყენებს იმისათვის, რომ ამ საქმესთან დაკავშირებით შეკითხვებს გაეცეს პასუხი“. 

დასასრულ, ელენე ხოშტარიამ დასკვნითი სიტყვით მიმართა კოლეგებს და საპარლამენტო უმრავლესობას საკითხის მხარდაჭერისკენ კიდევ ერთხელ მოუწოდა.

ამის შემდეგ, პარლამენტმა იმსჯელა ასევე საპარლამენტო უმცირესობაში შემავალი ფრაქციების: „ევროპული საქართველო“, „მოძრაობა თავისუფლებისთვის-ევროპული საქართველო“, „მოძრაობა თავისუფლებისთვის-რეგიონები“ საკანონმდებლო ინიციატივებზე, რომლებიც ძირითადად საქართველოს საგადასახადო კოდექსში ცვლილების შეტანას ითვალისწინებს.

მოქმედ კანონმდებლობაში შესატანი ცვლილებები ეხება მოგების გადასახადის შემცირებას; სპეციალური დაბეგვრის რეჟიმების შემოღებას; მცირე ბიზნესთან დაკავშირებული ურთიერთობების ახლებურად განისაზღვრებას; იმპორტის გადასახადის გაუქმებას; კონკრეტული სახის საქონლის აქციზით დაბეგვრის განაკვეთების ცვლილებას. საკითხები განსახილველად გამოიტანეს პარლამენტის წევრებმა ზურაბ ჭიაბერაშვილმა და გიორგი კანდელაკმა. ზურაბ ჭიაბერაშვილის განცხადებით, წარმოდგენილი ინიციატივების მიზანს მცირე და საშუალო ბიზნესისადმი მხარდაჭერა წარმოადგენს. როგორც საფინანსო-საბიუჯეტო კომიტეტის თავმჯდომარის პირველმა მოადგილემ პაატა კვიჟინაძემ განაცხადა, საქართველოს ხელისუფლებამ საკმაოდ მნიშვნელოვანი ნაბიჯები უკვე გადადგა და კიდევ გეგმავს გარკვეულ ღონისძიებებს ქვეყანაში ეკონომიკის აღოძინებისა და აღნიშნული კატეგორიის ბიზნესმენთა მხარდაჭერისათვის. წარმოდგენილი კანონპროექტები კი მისი შეფასებით, თითქმის ერთი მილიარდ 600 მილიონი ლარით გამოიწვევს ბიუჯეტის შემცირებას და ამ ნაბიჯზე წასვლა ნამდვილად უპასუხისმგებლობა იქნება. 

იურიდიულ საკითხთა კომიტეტის თავმჯდომარემ ეკა ბესელიამ ორგანული კანონის პროექტი „საერთო სასამართლოების შესახებ“ საქართველოს ორგანულ კანონში ცვლილების შეტანის თაობაზე“ და თანმდევი კანონპროექტები III მოსმენით განსახილველად წარადგინა და აღნიშნა, რომ კომიტეტის სხდომაზე რედაქციული ხასიათის ცვლილებები არ გამოუთქვამთ.

პლენარულ სხდომაზე გამოცხადებული შესვენების შემდეგ, კანონმდებლებმა მუშაობა განახლებული დღის წესრიგით გააგრძელეს.
პარლამენტის თავმჯდომარემ ირაკლი კობახიძემ განსახილველად წარადგინა პარლამენტის დადგენილების პროექტი „საზოგადოებრივი მაუწყებლის სამეურვეო საბჭოს წევრობის _ მეურვეობის კანდიდატთა შესარჩევი საპარლამენტო საკონკურსო კომისიის შემადგენლობის დამტკიცების შესახებ“. 
საქართველოს პარლამენტის დადგენილების პროექტი „სახელმწიფო აუდიტის სამსახურის 2017 წლის ფინანსური აუდიტის განმახორციელებელი საქართველოს პარლამენტის დროებითი კომისიის შექმნის მიზანშეწონილობის შესახებ“ განსახილველად საფინანსო-საბიუჯეტო კომიტეტის თავმჯდომარემ ირაკლი კოვზანაძემ გამოიტანა. კომისიის შემადგენლობა 16 წევრით განისაზღვა. 

კანონმდებლებმა, ტექნიკური შესვენების შემდეგ, დღევანდელ სხდომაზე განხილულ საკითხებს კენჭი უყარეს. პარლამენტმა 87 ხმით, ერთხმად, მხარი დაუჭირა პარლამენტის დადგენილების პროექტს „საზოგადოებრივი მაუწყებლის სამეურვეო საბჭოს წევრობის - მეურვეობის კანდიდატთა შესარჩევი საპარლამენტო საკონკურსო კომისიის შემადგენლობის დამტკიცების შესახებ“, ხოლო 86 ხმით, ერთხმად - პარლამენტის დადგენილების პროექტს „სახელმწიფო აუდიტის სამსახურის 2017 წლის ფინანსური აუდიტის განმახორციელებელი საქართველოს პარლამენტის დროებითი კომისიის შექმნის მიზანშეწონილობის შესახებ“.

პარლამენტმა მხარი არ დაუჭირა საპარლამენტო უმცირესობის მიერ წარმოდგენილ საკანონმდებლო ინიციატივებს, რომლებიც დღევანდელ პლენარულ სხდომაზე პირველი მოსმენით განიხილეს. პარლამენტის დადგენილების პროექტის - „აზერბაიჯანელ ჟურნალისტ, აფგან მუხთარლიზე თავდასხმის, მისი გატაცების, თავისუფლების უკანონო აღკვეთისა და საქართველოს სახელმწიფო საზღვარზე უკანონოდ გადაყვანის ფაქტის შემსწავლელი დროებითი საგამოძიებო კომისიის შექმნის მიზანშეწონილობის თაობაზე“ მომხრე იყო პარლამენტის 15 წევრი, წინააღმდეგი - 22. 

ამით, პარლამენტის პლენარულმა სხდომამ მუშაობა დაასრულა.