საქართველოს პარლამენტის თავმჯდომარის მოადგილემ, რუსუდან კერვალიშვილმა ევროპის საბჭოს საპარლამენტო ასამბლეის ქალთა წინააღმდეგ ძალადობის საკითხებზე მომხსენებელი ხოსე მენდეს ბოტა მიიღო.

მხარეებმა ოჯახურ ძალადობასთან, ტრეფიკინგთან, თანასწორობისა და პოლიტიკურ ცხოვრებაში ქალთა ჩართულობის გააქტიურებასთან დაკავშირებულ საკითხებზე ისაუბრეს.

რუსუდან კერვალიშვილმა და ხოსე მენდეს ბოტამ სტამბოლის კონვენციასთან საქართველოს მიერთების პერსპექტივები განიხილეს. სტამბოლის კონვენცია, რომლის ერთ–ერთი ავტორი ხოსე მენდეს ბოტაა, ძალადობის ყველა ფორმის აღმოფხვრას შეეხება.

ევროპის საბჭოს წარმომადგენელმა აღნიშნა, რომ საქართველომ საკუთარი კანონმდებლობის სტამბოლის კონვენციასთან ჰარმონიზაცია უნდა მოახდინოს. ხოსე მენდეს ბოტამ რუსუდან კერვალიშვილთან შეხვედრაზე ისაუბრა ქალთა მიმართ ძალადობის დაძლევის კუთხით ევროსაბჭოს წევრ ქვეყნებში არსებულ მდგომარეობაზე და სიახლეებზე ამ მიმართულებით. 

რუსუდან კერვალიშვილთან შეხვედრაზე განხილულ საკითხებთან დაკავშირებით ევროპის საბჭოს წარმომადგენელი საქართველოს პარლამენტის თავმჯდომარესთან არსებული გენდერული თანასწორობის საკონსულტაციო საბჭოს წევრებსაც შეხვდა.