ბიურომ დღევანდელ შემაჯამებელ სხდომაზე 4 ივლისიდან მოწვეული რიგგარეშე სესიის დღის წესრიგი დაამტკიცა. 

დღის წესრიგით ხვალ პარლამენტი პრეზიდენტის მიერ წარმოდგენილი მთავრობის შემადგენლობისთვის და საქართველოს მთავრობის მიერ წარმოდგენილი სამთავრობო პროგრამისთვის – ,,მეტი სარგებელი ხალხს“ ნდობის გამოცხადების საკითხს განიხილავს. პარლამენტის თავმჯდომარის, დავით ბაქრაძის განმარტებით, აღნიშნული საკითხი დღის განმავლობაში კომიტეტებმა და ფრაქციებმა განიხილეს.

ბიუროს გადაწყვეტილებით, რიგგარეშე სხდომაზე ასევე განიხილავენ კანონპროექტს საქართველოს 2012 წლის სახელმწიფო ბიუჯეტში შესატანი ცვლილებების შესახებ, რომელიც დასაქმების სახელმწიფო მინისტრის აპარატის შექმნით არის განპირობებული და კანონპროექტს ,,საქართველოს ზოგიერთ საკანონმდებლო აქტში ცვლილებების შეტანის შესახებ“, რომელიც ეროვნული საინვესტიციო სააგენტოს რეორგანიზაციას ითვალისწინებს.
რიგგარეშე სესიის სხდომა ხვალ 12 საათზე გაიმართება.