საქართველოს პარლამენტის სპორტისა და ახალგაზრდულ  საქმეთა კომიტეტთან არსებული სპორტის განვითარების სამეცნიერო-საკონსულტაციო საბჭოს სხდომის ოქმი N26

                                             18 მარტი 2011 წ.

სხდომას უძღვებოდა: საბჭოს თავმჯდომარე ვაჟა შუბლაძე

სხდომას ესწრებოდნენ:

საბჭოს წევრები: ემზარ ზენაიშვილი, ზურაბ კახაბრიშვილი, თენგიზ გაჩეჩილაძე, თამაზ თევზაძე, გიორგი გალდავა, ნინო ქურდაძე.

სხდომას ესწრებოდნენ აგრეთვე:

გიორგი ასანიძე – საქართველოს პარლამენტის სპორტისა და ახალგაზრდულ საქმეთა კომიტეტის თავმჯდომარე;

გია ჩანჩიბაძე – საქარველოს ბავშვთა და მოსწავლე ახალგაზრდობის სპორტის ეროვნული ფედერაციის ვიცე პრეზიდენტი;

დაზმირ ჯოჯუა – საქართველოს პარლამენტის ჯანმრთელობის დაცვისა და სოციალურ საკითხთა კომიტეტის ექსპერტი.

სხდომის დღის წესრიგი:

1. საქართველოში მოსწავლეთა ფიზიკური განათლების რეფორმის მიმდინარეობის შესახებ.

2. "საქართველოში ბავშვთა და მოზარდთა ფიზიკური განათლებისა და სპორტში მათი მასობრივად ჩაბმის ეროვნული სტრატეგიისა და სამოქმედო გეგმის” წიგნის პრეზენტაცია.                                        

სხდომის თავმჯდომარე: მიესალმა სამეცნიერო-საკონსულტაციო საბჭოს წევრებს. Aგააცნო მათ დღის წესრიგი, რომელიც საბჭომ ერთხმად დაამტკიცა.

დღის წესრიგით გათვალისწინებულ საკითხთან დაკავშირებით:
თავმჯდომარის ინფორმაციით "საქართველოში ბავშვთა და მოზარდთა ფიზიკური განათლებისა და სპორტში მათი მასობრივად ჩაბმის ეროვნული სტრატეგიისა და სამოქმედო გეგმის” შემუშავების შედეგად, უკვე გაკეთდა ძალიან მნიშვნელოვანი საქმე საქართველოში ბავშვთა ფიზიკური განათლების რეფორმის თვალსაზრისით. კერძოდ: განათლებისა და მეცნიერების სამინისტრომ გამოყოფო 1 მილიონი ლარი, მოსწავლეთა საშეჯიბრო სისტემის "ეროვნული სასკოლო სპორტული თამაშების”  ჩასატარებლად სპორტის 10 სახეობაში. აღნიშნული თამაშები არის კომპლექსური სპორტული ღონისძიება, რომელიც ქვეყნის საგანმანათლებლო სისტემის და მოსწავლეთა კულტურულ-სპორტული პროგრამის ნაწილი გახდება. განსაკუთრებით მნიშვნელოვანია ის, რომ მასში მონაწილეობას მიიღებს ქვეყნის პრაქტიკულად ყველა  საჯარო სკოლის 200 000-მდე მოსწავლე-სპორტსმენი. ამ თამაშების ჩატარებას, ორგანიზებას გაუწევს საქართველოს სპორტისა და ახალგაზრდობის საქმეთა სამინისტრო, შესაბამის სპორტულ ფედერაციებთან ერთად.

დღის წესრიგით გათვალისწინებულ მეორე საკითხთან დაკავშირებით:
სხდომის თავმჯდომარემ საბჭოს წევრებს მიულოცა, რომ "USAID”-ის ორგანიზაცია "ჭორლდ Lეარნინგ”-ის დაფინანსებით "საქართველოში ბავშვთა და მოზარდთა ფიზიკური განათლებისა და სპორტში მათი მასობრივად ჩაბმის ეროვნული სტრატეგია და სამოქმედო გეგმა”. დაიბეჭდა წიგნად (3000 ცალი). შემდგომ ეტაპზე იგეგმება მისი დარიგება საქართველოს ყველა სკოლაში ფიზაღზრდის პედაგოგებისა და სკოლის დირექტორებისთვის, ვინაიდან პროექტი არის გრძელვადიანი და იგი უნდა დამკვიდრდეს ჩვენი სკოლების ცხოვრებაში.
ვაჟა შუბლაძემ აღნიშნა: "მინდა მადლობა გადავუხადო ყველა ექსპერტს, რომელიც მუშაობდა ამ პროექტის ფარგლებში განათლების, სპორტისა და ჯანდაცვის საკითხებში, ყველას ვინც მოგვეხმარა ზღვა მასალის შესწავლა-დამუშავებაში. განსაკუთრებული მადლობა მინდა გამოვხატო გაეროს ბავშვთაფონდ "Unicef”-ის, ამერიკის საერთაშორისო განვითარების სააგენტო "USAID”-ის ორგანიზაცია "World Learning”-ის მიმართ, რომელთა დაფინანსებითაც გახდა შესაძლებელი ამ სტრატეგიის შემუშავება და შემდგომში წიგნად გამოცემა".

თავმჯდომარის ინფორმაციით, კვლავ იგეგმება 3000 წიგნის დაბეჭდვა, ამჟამად უკვე გაეროს ბავშვთა ფონდ "UNICEF"-ის დაფინანსებით.

დღის წესრიგით გათვალისწინებულ საკითხთან დაკავშირებით აზრი გამოთქვეს:

გიორგი ასანიძემ განაცხადა, რომ წარმოდგენილი ნაშრომის დევიზი არის "ჯანსაღი სკოლისათვის” და იგი არის წინაპირობა იმისა, რომ სკოლებში დაინერგოს სწორი მიმართულება სპორტის კუთხით. ეს არის რეალური მცდელობა, საქართველოს სკოლებში ფიზიკური განათლებისა და სპორტის გადაყვანის საბჭოური სისტემიდან ევროპულ ყაიდაზე.  

ემზარ ზენაიშვილმა განაცხადა, რომ აღნიშნული პროექტი საქართველოში მიმდინარე განათლების რეფორმის ერთ-ერთი მნიშვნელოვანი ნაწილია და ამ ნაწილშიც ევროპისკენ სვლა ჩვენი ქვეყნის არჩევანი და გარდაუვალი პერსპექტივაა.

ზურაბ კახაბრიშვილმა განაცხადა, რომ შესაძლებელია დოკუმენტი განვიხილოთ, როგორც ამ დარგში არსებული ამჟამინდელი სიტუაციის ერთ-ერთი ყველაზე სრულყოფილი აღწერილობის და რეკომენდაციების კრებული, რომელიც შესაძლებელია სახელმძღვანელოდ იქნეს გამოყენებული დარგის სპეციალისტებისათვის.

დაზმირ ჯოჯუამ განაცხადა, რომ წიგნი არის უდავოდ დროული და უაღრესად საჭირო, მასში ასახულია ღონისძიებათა კომპლექსი, რომელიც მიმართულია არა მარტო მომავალ სპორტსმენთა გამოსავლენად, არამედ მოზარდი თაობის ჯანმრთელობის გაუმჯობესების და გონებრივი განვითარებისთვის. მოწოდებული სამოქმედო გეგმა სრულიად პასუხობს ჯანმრთელობის დაცვის მსოფლიო ორგანიზაციის, UNICEF-ის, UNESCO-ს და მსოფლიო ბანკის 2000 წელს მიღებულ ერთობლივი გადაწყვეტილების ძირითად მოთხოვნას, რომლის მიზანია "სკოლებში ჯანმრთელობის დაცვის უზრუნველყოფისათვის ყველა რესურსის მიმართვა”.

სხდომის თავმჯდომარემ შეაჯამა სხდომის შედეგები და დიდი მადლობა გადაუხადა დამსწრე საზოგადოებას აქტიური მსჯელობისა და დამოკიდებულებისათვის.

საბჭოს თავმჯდომარე                           ვაჟა შუბლაძე

საბჭოს აღმასრულებელი მდივანი         ნინო ქურდაძე