ეუთოს საპარალამენტო ასამბლეამ მონაკოში გამართულ სხდომაზე საქართველოს შესახებ რეზოლუცია მიიღო, სადაც საუბარია საქართველოში განხორციელებულ ეთნოწმენდასა და ოკუპაციაზე. დოკუმენტში მკაცრი შეფასებებია დაფიქსირებული რუსეთთან დაკავშირებით. 

ეუთოს საპარლამენტო ასამბლეის სხდომაზე პრეზიდენტისა და ვიცე–პრეზიდენტების არჩევნები გაიმართა. პრეზიდენტად იტალიის საპარლამენტო დელეგაციის ხელმძღვანელი რიკარდი მაილიორი, ხოლო ერთ–ერთ ვიცე–პრეზიდენტად საქართველოს პარლამენტის თავმჯდომარის მოადგილე, გიორგი წერეთელი აირჩიეს. ვიცე–პრეზიდენტებად აირჩიეს ასევე ამერიკის შეერთებული შტატების, საფრანგეთის, გერმანიის და მონაკოს წარმომადგენლები.
ვიცე–პრეზიდენტის არჩევნებში ასევე მონაწილეობდა რუსეთის დელეგაციის ხელმძღვანელი კოვალიოვი, რომელმაც ვიცე–პრეზიდენტის პოსტის დასაკავებლად ხმების სათანადო რაოდენობა ვერ მოაგროვა.
ქართული დელეგაციის შეფასებით, ძალიან მნიშვნელოვანია ასეთი მაღალი პოსტის დაკავება ისეთ გავლენიან ორგანოში, რომლის წევრებიც ევროპის, ცენტრალური აზიისა და ამერიკის 55 ქვეყნის წარმომადგენელი 320 პარლამენტარია.
ეუთოს საპარლამენტო ასამბლეამ მუშაობა დღეს დაასრულა.