პარლამენტის თავმჯდომარე დავით ბაქრაძე დღეს მესტიას სტუმრობდა, სადაც სვანებს კვირიკობის დღესასწაული მიულოცა. 

კვირიკობა სვანეთში მე-14 საუკუნიდან აღინიშნება. უძველესი ტრადიციის მიხედვით, მრევლი მესტიიდან 5 კილომეტრის მოშორებით, ციცაბო კლდეზე აღმართულ ტაძარში მოსალოცად ადის და შესაწირი ააქვს.

დავით ბაქრაძემ ტაძარი მრევლთან ერთად მოილოცა, შემდეგ კი მესტიის განახლებული ცენტრი დაათვალიერა.

პარლამენტის თავმჯდომარე პიაცაზე მიმდინარე სამუშაოებითაც დაინტერესდა. 

აგვისტოს ბოლოსთვის მესტიაში ეთნოგრაფიული მუზეუმის რეაბილიტაცია დასრულდება, რომლის საცავიც ექსპონატების შესანახად აუცილებელი კლიმატ-კონტროლისა და განათების სისტემებით აღიჭურვება.

“დღევანდელ დღეს ვულოცავ საქართველოს ამ ძირძველი, ტრადიციული და ვაჟკაცური კუთხის ყველა მცხოვრებს, ვულოცავ ასევე სრულიად საქართველოს და ვუსურვებ, რომ სვანეთი ყოველ ახალ დღესასწაულს კიდევ უფრო გალამაზებული, კიდევ უფრო დამშვენებული შეხვდეს და აქ მცხოვრები ოჯახებიც ისევე, როგორც სრულიად საქართველოს მოსახლეობა, უკეთესად იყვნენ”, - განაცხადა პარლამენტის თავმჯდომარემ.