საქართველოს პარლამენტის აგრარულ საკითხტა კომიტეტის სხდომის ოქმი #2 

             2012 წლის 23 ოქტომბერი

სხდომის თავმჯდომარე:                   გიგლა აგულაშვილი       
                                                                     (კომიტეტის თავმჯდომარე)        

სხდომას ესწრებოდნენ:

კომიტეტის წევრები: გ. აგულაშვილი - კომიტეტის თავმჯდომარე, გ. ბუკია, გ. გელაშვილი, ვ. ლემონჯავა, გ. ჟვანია, გ. სამხარაული, გ. ქავთარაძე, ლ. ქარდავა, გ. ღვინიაშვილი, თ. ყაჭეიშვილი, რ. შავლოხაშვილი, პ. ცისკარიშვილი, რ. ხალვაში, ნ. ჯანაშია.

აპარატის თანამშრომლები: ი. ახალბედაშვილი - კომიტეტის აპარატის უფროსი, ნ. ნოზაძე, ს. სვანიძე, ს. უროტაძე, ი. ქველაძე, ი. ქიტიაშვილი.

მოწვეული სტუმრები: თ. ხიდაშელი - საქართველოს პარლამენტის წევრი, დ. კირვალიძე - საქართველოს სოფლის მეურნეობის მინისტრობის კანდიდატი, დ. შერვაშიძე, კ. ხუცაიძე, გ. კერძევაძე.

დღის წესრიგი

1. 1.სამთავრობო პროგრამა „ძლიერი, დემოკრატიული, ერთიანი საქართველოსთვის“ და საქართველოს მთავრობის შემადგენლობისათვის ნდობის გამოცხადების საკითხის განხილვა;

(მომხსენებელი: ხ. კაპანაძე - საქართველოს მთავრობის საპარლამენტო მდივნის აპარატი.)

კომიტეტის თავმჯდომარემ, გიგლა აგულაშვილმა, კომიტეტის წევრებს შესთავაზა დღის წესრიგით გათვალისწინებულ საკითხთან დაკავშირებით ფარული კენჭისყრის ჩასატარებლად ხმის დამთვლელი კომისიის თავმჯდომარედ გელა სამხარაულის,ხოლო ამავე კომისიის წევრებად - გიგა ბუკიასა და ლევან ქარდავას კანდიდატურები, რაზეც კომისიის წევრებმა ერთხმად დაუჭირეს მხარი.

.მოისმინეს:

ხ. კაპანაძის ინფორმაცია საქართველოს მთავრობის შემადგენლობასა და სამთავრობო პროგრამისათვის „ძლიერი, დემოკრატიული, ერთიანი საქართველოსთვის“ ნდობის გამოცხადების თაობაზე. მან კომიტეტის წევრებს წარუდგინა სამთავრობო პროგრამის დებულებები, ხოლო სოფლის მეურნეობის მინისტრობის კანდიდატმა - დავით კირვალიძემ ისაუბრა სოფლის მეურნეობის განვითარების მიმართულებებზე, რომელიც საქართველოს მთავრობის ერთ-ერთი ძირითადი პრიორიტეტია. სასოფლო-სამეურნეო წარმოების ზრდა უზრუნველყოფს საქართველოს შრომითი რესურსების მნიშვნელოვანი ნაწილის სტაბილურ შემოსავალს, აგრეთვე საქართველოს სასურსათო უსაფრთხოებასა და ქვეყნის საექსპორტო პოტენციალის ზრდას. მცირე და საშუალო ბიზნესის განვითარება უზრუნველყოფს ქვეყნის ეკონომიკური კრიზისიდან გამოყვანას, უმუშევრობის შემცირებას და სიღარიბის დაძლევას. მრავალრიცხოვანი და ძლიერი საშუალო ფენის ჩამოყალიბებას.

სოფლის მეურნეობის განვითარების უპირველესი გარანტი მკაფიოდ განსაზღვრული აგრარული და რეგიონალური პოლიტიკა და სოფლის მეურნეობის სექტორის დაფინანსების რამდენჯერმე გაზრდა იქნება. სოფლის მეურნეობის დაფინანსების წყარო იქნება სახელმწიფო ბიუჯეტი, საერთაშორისო ორგანიზაციებისა და ცალკეული დონორი ქვეყნების მიერ გაცემული სესხები და გრანტები, კერძო ინვესტიციები (ადგილობრივი და უცხოური). შეიქმნება „სოფლის მეურნეობის განვითარების“ 1-მილიარდიანი ფონდი. საჭიროა დარეგულირდეს მიწათსარგებლობის საკითხები; გაიზარდოს აგრარულ სექტორში მწარმოებლურობა, რენტაბელურობა და კონკურენტუნარიანობა; ჩამოყალიბდეს აგრარული განათლებისა და მეცნიერების, კონსულტირებისა და ექსტენციის თანამედროვე სისტემა; ქართული პროდუქცია დაბრუნდეს შიდა ბაზარზე; მოხდეს რეგიონებში ბიზნესგარემოს გაჯანსაღება და სტიმულირება; უზრუნველყოფილი იქნას სასურსათო უსაფრთხოება, სურსათის უვნებლობა და აგრობიომრავალფეროვნების შენარჩუნება.

/სამთავრობო პროგრამა „ძლიერი, დემოკრატიული, ერთიანი საქართველოსთვის“ და საქართველოს მთავრობის შემადგენლობა - ოქმს თან ერთვის/.

აზრი გამოთქვეს:

1.  თ. ხიდაშელი: მე მაქვს ორი შეკითხვა: მაინტერესებს ირიგაციასა და წყლის პრობლემებთან მიმართებაში რას აპირებთ? და კიდევ: კრედიტებთან დაკავშირებით, იაფი კრედიტის სისტემაზე იქნებ გვითხრათ რა გეგმა აქვს მთავრობას?

2.  გ. ღვინიაშვილი: თქვენი წინასაარჩევნო დაპირება იყო უფასო ტრაქტორები, უფასო ხვნა-თესვა, მოყვანილი მოსავლის ბაზრამდე მიტანა. შესრულდება თუ არა ეს და რა რესურსებით? საკმარისია თუ არა ამისათვის სასოფლო-სამეურნეო ტექნიკა, სახსრები?

3.  ვ. ლემონჯავა: სოფლის მეურნეობის სუბსიდირებაზე სახელმწიფო ბიუჯეტიდან რა ნაწილი გამოიყოფა?

4.  პ. ცისკარიშვილი: თქვენს მიდგომას ირიგაციასთან, სერვის-ცენტრებთან დაკავშირებით ვიზიარებ, რეფორმების მაგალითები, ექსტენცია, კოოპერაცია სწორია. მაგრამ სად არის უფასო ხვნა-თესვა, უფასო კრედიტები, სოფლის მეურნეობის მხარდაჭერის პროგრამა, ანუ ის, რაც იყო წინსაარჩევნო დაპირებები, თორემ დიდ ნაწილში ვიზიარებთ თქვენს მიდგომებს.

5.  ლ. ქარდავა: წლის ბოლომდე რა რეფორმების გატარებას აპირებთ?

6.  გ. ბუკია: წინა ხელისუფლებამ სიმინდის თესლი შემოიტანა, დაზარალდნენ ფერმერები და ეს ხალხი დღესაც ელოდება შეღავათების გაწევას, ანაზღაურებას. რითი შეიძლება მათი დახმარება?

7.  თ. ხიდაშელი: სოფლის მეურნეობის დასაფინანსებლად იქნება „სოფლის მეურნეობის განვითარების“ 1-მილიარდიანი ფონდი. ეს ახალი წლიდან არის გათვალისწინებული. ყველა პროგრამა, რომელიც ნახსენები იყო, ეს იყო ამ ფონდის ქვეშ ნაგულისხმევი. საპროგრამო დაპირებიდან პრობლემა არ არის. ხალხს რომ ჭირდება დახმარება, ეს არის პრობლემა, თორემ მომავალი წლიდან შხამ-ქიმიკატები, ტრაქტორები, დიზელი, უფასო იქნება, მაგრამ ამისათვის უნდა წარმოადგინოს მომხმარებელმა კონკრეტული პროგრამა. ეს პროგრამა რა ფორმით იქნება წარმოდგენილი, ფერმერი ამას თვითონ გადაწყვეტს.

8.   გ. ღვინიაშვილი: მინდა დავაზუსტო, რომ ამომრჩევლებთან მივიტანო ინფორმაცია. ანუ ის, რასაც ქალბატონი თინა ამბობს, ეს დაპირება გაზაფხულიდან ამოქმედდება?

9. დ. კირვალიძე: ირიგაციასთან დაკავშირებით მოგახსენებთ, ეს სახელმწიფოს საქმეა, ამ არხებს ჭირდება რეაბილიტაცია, ამის გარეშე არც უფასოდ ხვნას აქვს აზრი. შესაძლებელია ამის გაკეთება, მაგრამ ეს გრძელვადიან და ხანგრძლივ სამუშაოს წარმოადგენს. მსოფლიო ბანკთან შეხვედრა მქონდა, ისინი თანადაფინანსებაზე წამოვლენ. რაც შეეხება კრედიტებს და უპროცენტო სესხებს, უფასო ზოგადად არაფერი არ არსებობს, ყოველთვის ვიღაც იხდის. 1-3 ჰა-მდე, ანუ პატარა ფართობებზე იყო გათვლილი უფასო ხვნა-თესვა. დიდ ფართობს სხვა ტიპის დახმარება ჭირდებათ. აგროვადებით საშემოდგომო ხვნა-თესვის პერიოდი გავიდა. ასე, რომ ყველა ერთად შევთანხმდეთ, საგაზაფხულო პროგრამებიდან დავიწყოთ. „სოფლის მეურნეობის განვითარების“ 1-მილიარდიანი ფონდი სოფლის მეურნეობის სამინისტროს კომპეტენციას ცილდება და ეს მისი სამართავი სტრუქტურა არ უნდა იყოს, აქ ფინანსთა და ეკონომიკის სამინისტროებიც უნდა მონაწილეობდნენ. ბიუჯეტიდან რა ნაწილი უნდა იყოს სოფლის მეურნეობაზე? რაც შეიძლება მეტი. უნდა მივაღწიოთ მუშა-ხელის გამოთავისუფლებას გადამუშავებაზე, მრეწველობა, აგროტურიზმი, ღვინის ტურიზმი, მიწის რეგისტრაცია, მიწის ნიადაგის ხარისხობრივი ანალიზი, რაიონული სამმართველოების აღდგენა, ეს გადაუდებელია.                                   

/დ. კირვალიძემ ამომწურავად უპასუხა დეპუტატების შეკითხვებს, რის შემდეგაც გაიმართა კენჭისყრა/.

ფარული კენჭისყრის შედეგად

 გადაწყვიტეს: (8 მომხრე, 6 წინააღმდეგი)

 კომიტეტმა, საქართველოს კონსტიტუციის მე-80 მუხლის მე-2 პუნქტის შესაბამისად, ფარული კენჭისყრით (8 მომხრე და 6 წინააღმდეგი) მხარი დაუჭირა ნდობის მისაღებად წარმოდგენილ საქართველოს მთავრობის შემადგენლობასა და ამავე მუხლის შესაბამისად წარმოდგენილ საქართველოს სამთავრობო პროგრამას „ძლიერი, დემოკრატიული, ერთიანი საქართველოსათვის“ და მიზანშეწონილად ჩათვალა მისი გატანა პარლამენტის სხდომაზე ნდობის მისაღებად.

სხდომის თავმჯდომარე:                                              გ. აგულაშვილი

             სხდომის მდივანი:                                                        ი. ქიტიაშვილი