აგრარულ საკითხთა კომიტეტის სხდომის ოქმი #10

2013 წლის 8 თებერვალი

სხდომის თავმჯდომარე:     გიგლა აგულაშვილი     (კომიტეტის თავმჯდომარე)        

 სხდომას ესწრებოდნენ: 

კომიტეტის წევრები: გ. აგულაშვილი - კომიტეტის თავმჯდომარე, გ. სამხარაული - კომიტეტის თავმჯდომარის პირველი მოადგილე, თ. ყაჭეიშვილი - კომიტეტის თავმჯდომარის მოადგილე, გ. გელაშვილი, გ. გოზალიშვილი, დ. ლორთქიფანიძე, გ. ქავთარაძე, რ. შავლოხაშვილი, ვ. ჩიტაშვილი, რ. ხალვაში.

 სხდომას საპატიო მიზეზით არ ესწრებოდნენ: გ. ღვინიაშვილი - კომიტეტის თავმჯდომარის მოადგილე, ვ. ლემონჯავა, ლ. ქარდავა, პ. ცისკარიშვილი, ნ. ჯანაშია. 

აპარატის თანამშრომლები: ი. ახალბედაშვილი - კომიტეტის აპარატის უფროსი, რ. ქუთათელაძე, ს. სვანიძე, ს. უროტაძე, ი. ქველაძე, ი. ქიტიაშვილი. 

მოწვეული სტუმრები:  დ. გილიგაშვილი - საქართველოს სოფლის მეურნეობის მინისტრის მოადგილე, შ. ამირეჯიბი - საქართველოს გარემოს დაცვის მინისტრის მოადგილე, მ. ბითაძე - საქართველოს გარემოს დაცვის სამინისტროს იურიდიული დეპარტამენტის უფროსი.

დღის წესრიგი

                1. საქართველოს პარლამენტის აგრარულ საკითხთა კომიტეტის 2013 წლის საკანონმდებლო და საზედამხედველო საქმიანობის გეგმის განხილვა.

                                                                                                                     (მომხსენებელი: გ. აგულაშვილი - საქართველოს პარლამენტის აგრარულ საკითხთა კომიტეტის თავმჯდომარე). 

                                                                                                        2.  საქართველოს მთავრობის სტრუქტურის, უფლებამოსილებისა და საქმიანობის წესის შესახებ“ საქართველოს კანონში ცვლილების შეტანის თაობაზე“ საქართველოს   კანონში ცვლილების შეტანის შესახებ“ და მისგან გამომდინარე კანონების პროექტები.

(მომხსენებელი: შ. ამირეჯიბი - საქართველოს გარემოს დაცვის მინისტრის მოადგილე).  

 სხდომის თავმჯდომარემ, გიგლა აგულაშვილმა, კომიტეტის წევრებს მიაწოდა ინფორმაცია საპარლამენტო ფრაქცია „ნაციონალური მოძრაობა - რეგიონები“-ს  კვოტით აგრარულ საკითხთა კომიტეტში ვაჟა ჩიტაშვილის წარდგინების შესახებ. 

სხდომაზე დამსწრე კომიტეტის წევრებმა ერთხმად დაამტკიცეს დღის წესრიგი წარმოდგენილი სახით. 

         I. მოისმინეს: 

გ. აგულაშვილის ინფორმაცია  საქართველოს პარლამენტის აგრარულ საკითხთა კომიტეტის 2013 წლის საკანონმდებლო და საზედამხედველო საქმიანობის გეგმის თაობაზე. მან დეტალურად ისაუბრა განსახილველ საკანონმდებლო საკითხებზე ვადების მითითებით, ასევე, იმ ინფორმაციებზე, რომლის მოსმენაც იგეგმება სოფლის მეურნეობის სამინისტროს მხრიდან, თუმცა აღნიშნული სამინისტროსგან იყო თხოვნა ვადების გადაწევასთან დაკავშირებით საზედამხედველო საქმიანობის გეგმის ნაწილში. ეს არ ეხება მე-6 პუნქტს, რომელიც შემაჯამებელია და წარმოადგენს სოფლის მეურნეობის სამინისტროს მიერ გაწეული საქმიანობის შესახებ ინფორმაციას. შესაბამისად, თავმჯდომარემ შესთავაზა კომიტეტის წევრებს, უფრო მოქნილი გრაფიკის  მიღებისთვის, ვადები გაიწეროს: მაგალითად, მაისის ნაცვლად მაისი-ივნისი და ა.შ. ჩანიშნული პერიოდისათვის სამინისტროს მზაობისა და მდგომარეობის მიხედვით, ან თვის ბოლოს, ან მომდევნო თვის დასაწყისში, ჩატარდეს მოსმენები.

            /აღნიშნული გეგმა ოქმს თან ერთვის/.   

გადაწყვიტეს: 

კომიტეტმა, გამოთქმული შენიშვნების გათვალისწინებით, მხარი დაუჭირა საქართველოს პარლამენტის აგრარულ საკითხთა კომიტეტის 2013 წლის საკანონმდებლო და საზედამხედველო საქმიანობის გეგმას.

     II. მოისმინეს: 

შ. ამირეჯიბის ინფორმაცია „საქართველოს მთავრობის სტრუქტურის, უფლებამოსილებისა და საქმიანობის წესის შესახებ“ საქართველოს კანონში ცვლილების შეტანის თაობაზე“ და მისგან გამომდინარე კანონების პროექტების შესახებ. მან აღნიშნა, რომ კანონპროექტის მიღების მიზეზია:      საქართველოს მთავრობაში განსახორციელებული სტრუქტურული ცვლილებები, რომლის შესაბამისად რეორგანიზებულ იქნება საქართველოს გარემოს დაცვის სამინისტრო საქართველოს გარემოსა და ბუნებრივი რესურსების დაცვის სამინისტროდ, ხოლო ენერგეტიკისა და ბუნებრივი რესურსების სამინისტრო - ენერგეტიკის სამინისტროდ.     

        ასევე, საქართველოს გარემოსა და ბუნებრივი რესურსების დაცვის სამინისტრო ჩაითვლება საქართველოს გარემოს დაცვის სამინისტროს უფლებამონაცვლედ, ხოლო  საქართველოს ენერგეტიკის სამინისტრო - ენერგეტიკისა და ბუნებრივი რესურსების სამინისტროს უფლებამონაცვლედ კანონმდებლობით მათთვის მინიჭებული უფლებამოსილებების ფარგლებში. ასევე, საქართველოს გარემოსა და ბუნებრივი რესურსების დაცვის სამინისტრო ჩაითვლება საქართველოს ენერგეტიკისა და ბუნებრივი რესურსების სამინისტროს უფლებამონაცვლედ ბუნებრივი რესურსების (გარდა ნავთობისა და გაზისა), ბირთვული და რადიაციული უსაფრთხოების სფეროში.

     გარდა ზემოაღნიშნულისა, ამავე კანონპროექტის შესაბამისად, გარემოს დაცვის, ენერგეტიკისა და ბუნებრივი რესურსების სამინისტროებისა და მათ სისტემაში შემავალი საჯარო სამართლის იურიდიული პირების რეორგანიზაციასთან დაკავშირებით, საქართველოს მთავრობას ევალება ,,საქართველოს გარემოს დაცვის, საქართველოს ენერგეტიკისა და ბუნებრივი რესურსების სამინისტროსა და მათ სისტემაში შემავალი საჯარო სამართლის იურიდიული პირების რეორგანიზაციის, უფლებამონაცვლეობის განსაზღვრისა და სახელმწიფო საქვეუწყებო დაწესებულების შექმნის შესახებ“ საქართველოს მთავრობის დადგენილების გამოცემა.

„საქართველოს მთავრობის სტრუქტურის, უფლებამოსილებისა და საქმიანობის წესის შესახებ“ საქართველოს კანონში ცვლილების შეტანის თაობაზე” კანონპროექტის თანმდევი პროექტების მიღების მიზანია ასახულ იქნეს ის ცვლილებები, რომლებიც გათვალისწინებულია „საქართველოს მთავრობის სტრუქტურის, უფლებამოსილებისა და საქმიანობის წესის შესახებ“ საქართველოს კანონით და შესაბამისად განხორციელდეს საკნონმდებლო ბაზის ჰარმონიზაცია. 

            მომხსენებლის განმარტებით, მათ მიერ წარმოდგენილი ცვლილებები მიწის საკითხებს არ მოიცავს, რადგან სერიოზული სამუშაოებია ჩასატარებელი, როგორც სოფლის მეურნეობის სამინისტროს, ასევე სხვა  ორგანიზაციებთან, რათა მოხდეს კომპეტენციების ზუსტი გამიჯვნა. 

            /აღნიშნული პროექტები ოქმს თან ერთვის/.  

აზრი გამოთქვეს: 

1.    გ. აგულაშვილი: თქვენი განმარტება მიწის საკითხებთან დაკავშირებით, ხომ არ გულისხმობს იმ საფრთხეს, რომ მიწის ეროზიასთან, მისი ნაყოფიერი ფენის მოხსნა-შენახვასთან, ნიადაგის დაცვასთან დაკავშირებული უამრავი საკითხი რაღაც პერიოდის განმავლობაში რჩება რეგულაციების ან კონტროლის გარეშე? 

2.  მ. ბითაძე: „ნიადაგის კონსერვაციის კანონში“, რომელიც უკვე გადმოგზავნილია მთავრობიდან და უახლოეს ბიუროს სხდომაზე იქნება წარმოდგენილი, ამ საკითხზე გვექნება მსჯელობა უფრო დეტალურად. პროექტს შევეხეთ მხოლოდ ტექნიკური თვალსაზრისით, რომლის თანახმად გარემოს დაცვის სამინისტროს სახელწოდება იცვლება. რეგულირების გარეშე არაფერი რჩება. რჩება დაკონსერვებული ზუსტად იგივე მდგომარეობაში, როგორც დღეს არის. ეს კანონი უბრალოდ ცუდად არის გაწერილი. 2011 წელს, როდესაც მოხდა კანონით ფუნქციების გადანაწილება სოფლის მეურნეობისა და იუსტიციის სამინისტროებს შორის, ისინი ცუდად იქნა გაწერილი. არის მსჯელობა მინისტრებს შორის, რომ ეს კომპეტენციები უფრო კარგად გაიმიჯნოს. ამ ეტაპზე ხელი არაფრისთვის გვიხლია, რადგან წარმოდგენილი ცვლილებები მხოლოდ ტექნიკური ხასიათისაა. 

3. მე მაქვს განსახილველ საკითხთან დაკავშირებით კითხვა: „საქართველოს მთავრობის სტრუქტურის, უფლებამოსილებისა და საქმიანობის წესის შესახებ“ საქართველოს კანონის 35-ე მუხლის მე-3 პუნქტის „ვ“ ქვეპუნქტის მოქმედი რედაქციით საქართველოს გარემოს დაცვისა და ბუნებრივი რესურსების სამინისტროს გადაცემული ჰქონდა ის ფუნქციები და უფლებამოსილებანი, რომლებიც უკავშირდება მიწის მიზნობრივი გამოყენებისა და დაცვის შესახებ კანონმდებლობით გათვალისწინებული მოთხოვნების შესაბამისად სახელმწიფო კონტროლის განხორციელებას, ნიადაგის ნაყოფიერი ფენის მოხსნის, შენახვისა და გამოყენების წესების შემუშავებას, დაბინძურებული და დეგრადირებული მიწის კონსერვაციის ღონისძიებების მომზადებას და მათ შესრულებაზე სახელმწიფო კონტროლს. ასევე, ნიადაგის ეროზიის საწინააღმდეგო ღონისძიებების განხორციელებაზე სახელმწიფო კონტროლს. კანონპროექტიდან ეს ფუნქციები მთლიანად ამოღებულია? 

4. მ.ბითაძე: თქვენ წარმოდგენილი გაქვთ 2 ვარიანტი, ადრე გვქონდა კანონი და გვაქვს კიდევ კანონი, რომელიც ერთმანეთში არ კოდიფიცირდება. გვაქვს 2 კანონი, კანონი და ცვლილება კანონში. ჩვენ სამართლებრივი ტექნიკის თვალსაზრისით ძალიან გაგვიჭირდა ფუნქციების უკან დაბრუნება ისე, რომ არ შევხებოდით იმ კომპეტენციებს, რომლებიც სოფლის მეურნეობისა და იუსტიციის სამინისტროებს გადაეცა. რეალურად, ამ პაკეტით სამინისტროებიდან ფუნქციები არ წამოგვიღია. 

5.  გ. აგულაშვილი: რთული აღსაქმელია, გეთანხმებით. იმდენ კანონში შედის ცვლილება პაკეტით, ისეთი ტიპის ცვლილებები შეიძლება მივიღოთ გააზრების გარეშე, რომ რეალურად შესაძლებელია ძალიან მექანიკური, ან თანხმობა, ან უარყოფა გამოვიდეს. ძალიან მნიშვნელოვანი საკითხებია და ჩვენ ნათელი წარმოდგენა უნდა შეგვექმნას, რას ვაკეთებთ. 

 ერთი კითხვა მაქვს კიდევ. „სახელმწიფო ქონების შესახებ“ საქართველოს კანონის მოქმედი რედაქციის 36-ე მუხლის 11 პუნქტით  განსაზღვრულია, რომ  სახელმწიფო ტყის ფონდის მიწები სარგებლობის უფლებით გაიცემა სასოფლო-სამეურნეო მიზნით  არა უმეტეს 10 წლის, ხოლო არასასოფლო-სამეურნეო მიზნით – არა უმეტეს 49 წლის ვადით. კანონპროექტიდან ამოღებულია  სახელმწიფო ტყის ფონდის მიწების სარგებლობის უფლებით გაცემა სასოფლო-სამეურნეო და  არასასოფლო-სამეურნეო მიზნით, ხოლო განმარტებით ბარათში არ არის ასახული ამ დებულების ამოღების მიზანი. 

6.  ს. უროტაძე: „სახელმწიფო ქონების მართვის შესახებ“ საქართველოს კანონის 36-ე მუხლის პირველი პრიმა პუნქტით, ტყის ფონდის მიწების სარგებლობის უფლებით გაცემა ხდებოდა სასოფლო-სამეურნეო დანიშნულების და არასასოფლო-სამეურნეო დანიშნულების მიზნით. წარმოდგენილ პროექტში მოცემულია მხოლოდ ტყის ფონდის მიწების სარგებლობის უფლებით გაცემა, რაც ამ კანონის კომპეტენციას არ წარმოადგენს. 

7.   მ. ბითაძე: 35-ე მუხლს, იმ მუხლებს, რომლებიც ეხებოდა მიწის საკითხებს და ზოგადად სოფლის მეურნეობის სფეროსთან დაკავშირებულ საკითხებს, ამ ეტაპზე არ შევხებივართ. რაც იყო მთავრობის კანონში, გადმოტანილი იქნა ახალი ცვლილების კანონში. თუმცა, რეალურად ეს საკითხები ნაწილობრივ გასამიჯნია. 

რაც შეეხება მე-2 შენიშვნას, როგორც ჩანს ტექნიკური შეცდომაა, მოგვაწოდეთ თქვენი შენიშვნები და გავითვალისწინებთ. 

8.გ. აგულაშვილი: მე გთავაზობთ ჩვენი გამოთქმული შენიშვნები ამ ნაწილში დავაფიქსიროთ. მისი გადამუშავების პროცესში, უკვე შესაძლებელი იქნება მოხდეს წარმოდგენილი შენიშვნების გათვალისწინება.

           გადაწყვიტეს: 

კომიტეტმა, გამოთქმული შენიშვნების გათვალისწინებით, მხარი დაუჭირა „საქართველოს მთავრობის სტრუქტურის, უფლებამოსილებისა და საქმიანობის წესის შესახებ“ საქართველოს კანონში ცვლილების შეტანის თაობაზე“ საქართველოს კანონში ცვლილების შეტანის შესახებ“ და მისგან გამომდინარე კანონების პროექტებს და მიზანშეწონილად ჩათვალა მათი გატანა პარლამენტის სხდომაზე პირველი მოსმენით განსახილველად.    /წარმოდგენილ საკითხზე კომიტეტის დასკვნა ოქმს თან ერთვის/.

სხდომის თავმჯდომარე:                                              გ. აგულაშვილი

            სხდომის მდივანი:                                                        ი. ქიტიაშვილი