მოისმინეს მახირ დარზიევის  მოხსენება. მან  აღნიშნა, რომ  იგი იმყოფებოდა აზერბაიჯანის რესპუბლიკაში, სადაც შეხვედრები გამართა, როგორც იქაური ხელისუფლების, ასევე არასამთავრობო ორგანიზაციების წარმომადგენლებთან, ადგილობრივ მოსახლეობასთან, აზერბაიჯანში მცხოვრებ საქართველოს მოქალაქეებთან და აზერბაიჯანის მოქალაქე ეთნიკურ ქართველებთან.

მომხსენებლმა კომიტეტის წევრებს ინფორმაცია მიაწოდა, როგორც აზერბაიჯანის რესპუბლიკაში არსებულ საერთო ვითარებაზე, ისე იქ მცხოვრები აზერბაიჯანელი და ქართველი ეროვნების საქართველოს მოქალაქეებისა და ქართული ისტორიული დიასპორის პრობლემებზე. მან ასევე ისაუბრა ორი ქვეყნის სტრატეგიული თანამშრომლობის პრიორიტეტებზე და იმედი გამოთქვა, რომ ქართველი და აზერბაიჯანელი კანონმდებლები ყველაფერს გააკეთებენ მოქალაქეების პრობლემებისა და არსებული აქტუალური საკითხების  გადასაჭრელად.

მახირ დარზიევის განმარტებით, საქართველოს მოქალაქეების დიდი ნაწილი არალეგალურად იმყოფება აზერბაიჯანში. მათ ემუქრებათ დეპორტაციის საფრთხე. აზერბაიჯანის კანონმდებლობის მიხედვით, უცხო ქვეყნის მოქალაქეებს აქვთ ქვეყნის ტერიტორიაზე უვიზოდ ყოფნის ერთთვიანი ვადა და შესვლიდან სამი დღის ვადაში უნდა დაფიქსირდნენ  მიგრაციის სამსახურში. წინააღმდეგ შემთხვევაში, ისინი დაჯარიმდებიან და  მოუწევთ ქვეყნის დატოვება. აღნიშნულ საკითხთან დაკავშირებით, იგი ესაუბრა მიგრაციის სამსახურის უფროსს და მხარეები შეთანხმდნენ, რომ გარკვეული შეღავათები დაწესდება  საქართველოს მოქალაქეებისათვის. კერძოდ, ისინი გათავისუფლდებიან ჯარიმებისგან და მიეცემათ გარკვეული ვადა   საბუთების მოსაწესრიგებლად.

მახირ დარზიევმა აღნიშნა, რომ შეხვდა კულტურისა და ტურიზმის სამინისტროს წარმომადგენლებს და მათთან ისაუბრა კახის კულტურის სახლის შესახებ. მისი განმარტებით,  უკვე გამოყოფილია ახალი შენობა  კულტურის სახლისათვის კახში და საქართველოს კულტურისა და ძეგლთა დაცვის სამინსტროს აზერბაიჯანული მხრიდან გადაეგზავნა სათანადო მიმართვა შენობის ბალანსზე აყვანის თაობაზე.

მომხსენებელმა ასევე ისაუბრა რელიგიურ საკითხებზე და აღნიშნა, რომ აზერბაიჯანის რესპუბლიკის კანონმდებლობით, ღვთისმსახურების აღსრულების უფლება აქვს მხოლოდ აზერბაიჯანის მოქალაქეს. სწორედ ამიტომ, პრობლემა ექმნება ქართულ ეკლესიებს ღვთისმსახურების შესრულებისას.  თუმცა,  ამ კუთხითაც იგეგმება გარკვეული მოლაპარაკებები.

მახირ დარზიევმა ისაუბრა განათლების სფეროში არსებულ პრობლემებზეც. მისი თქმით, საქართველოს აზერბაუჯანულ სკოლებში არსებობს ქართული ენის პედაგოგების კვალიფიკაციისა და სახელმძღვანელოების ხარისხის სერიოზული პრობლემა. ამასათან დაკავშირებით, ის ესაუბრა განათლების სფეროს წარმომადგენლებს აზერბაიჯანში.

მომხსენებელი გამოვიდა ინიციატივით, რომ გაიხსნას ქართული კულტურის ცენტრი ბაქოში და ანალოგიურად, აზერბაიჯანული კულტურის ცენტრი თბილისში, რასაც კომიტეტების წევრების მხრიდან დადებითი შეფასება მოჰყვა. მან აღნიშნა, რომ საკმაოდ დიდია საქართველოდან გასული  აზერბაიჯანის რესპუბლიკის მოქალაქეთა რაოდენობა. აუცილებელია მათი გამოყენება ორ ქვეყანას შორის კონტაქტების გაღრმავებაში.

მახირ დარზიევმა ასევე ისაუბრა საქართველოს პრემიერ-მინისტრის ვიზიტზე ბაქოში და მის მნიშვნელობაზე  ორი ქვეყნის პოლიტიკური და კულტურული ცხოვრებისათვის.

კომიტეტის წევრების მხრიდან დაისვა სხვადასხვა შეკითხვები, რომლებსაც მომხსენებელმა ამომწურავად უპასუხა.

კომიტეტმა გადაწყვიტა

1. 1.კომიტეტის წევრებმა  მოისმინეს და მოიწონეს კომიტეტის წევრის, მახირ დარზიევის მიერ გაწეული საქმიანობის შესახებ ინფორმაცია;

1. 2.კომიტეტის წევრებმა მხარი დაუჭირეს ქართულ-აზერბაიჯანული ურთიერთობების თაობაზე გაფართოებული სხდომის ჩატარების ინიციატივას.

სხდომის თავმჯდომარე                                                     გუბაზ სანიკიძე

    სხდომის მდივანი                                                        ნათია გოგუა