სახელმწიფო დაზვერვის სამსახური საქართველოს მთავრობის დაქვემდებარებაში გადადის. აღნიშნულიდან გამომდინარე, „საქართველოს დაზვერვის სამსახურის შესახებ“ საქართველოს კანონში ცვლილებები შედის. კანონპროექტი თავდაცვისა და უშიშროების კომიტეტის წევრებს პარლამენტის წევრმა, ირინა იმერლიშვილმა წარუდგინა. მისი ინფორმაციით, დაზვერვის სამსახური, ისევე როგორც სახელმწიფო დაცვის სპეციალური სამსახური, საქართველოს პრეზიდენტის დაქვემდებარების სფეროდან გამოიყოფა და მთავრობის უშუალო დაქვემდებარებაში არსებული აღმასრულებელი ხელისუფლების სპეციალური დანიშნულების დაწესებულებად ჩამოყალიბდება.

მისივე განცხადებით, წარმოდგენილი ცვლილებებით საქართველოს მთავრობასა და პრეზიდენტს შორის სახელმწიფო საიდუმლოების ინფორმაციასთან დაკავშირებული უფლებამოსილებათა გამიჯვნა მოხდება. კანონპროექტის განხილვამ პარლამენტის წევრის, დავით დარჩიაშვილის უკმაყოფილება გამოიწვია, რომელმაც პროტესტის ნიშნად კომიტეტის სხდომა დატოვა.
თავდაცვისა და უშიშროების კომიტეტის სხდომაზე „სამხედრო ვალდებულებისა და სამხედრო სამსახურის შესახებ“ საქართველოს კანონში ცვლილების შეტანის თაობაზე“ კანონპროექტი განიხილეს. წარმოდგენილი ცვლილებებით, გაწვევით ვადიანი სამხედრო სამსახურის ვადა 15 თვის ნაცვლად, 12 თვით განისაზღვრება. ცვლილებები წვევამდელთათვის სამხედრო სამსახურში გაწვევის გადავადებასაც ეხება, რომლის მიხედვითაც, თუ წვევამდელი ზოგადსაგანმანათლებლო დაწესებულების დასრულების წელს ერთიან ეროვნულ გამოცდებს გაივლის, მას გადაუვადდება სამხედროში გაწვევა. სამხედრო სამსახურში გაწვევის გადავადება სტუდენტის სტატუსის მოპოვების შემდეგაც გრძელდება. კომიტეტის თავმჯდომარის, ირაკლი სესიაშვილის განცხადებით, აღნიშნული კანონპროექტის მომზადებაში კომიტეტი თავდაცვის სამინისტროსთან ერთობლივად მუშაობდა და მისი მიღება მნიშვნელოვან ხარვეზებს აღმოფხვრის.

ირაკლი სესიაშვილის განმარტებით, 15 თვიანი სამხედრო სამსახურით დარღვეულია გაწვევის ვადები, რომლებიც გაზაფხულით და შემოდგომით არის განსაზღვრული. მისივე განცხადებით, წარმოდგენილი ცვლილებების მიღება სამხედრო მოსამსახურეებისათვის ყოველ 6 თვეში სამხედრო ფორმით უზრუნველყოფის საკითხსაც მოაგვარებს.
კომიტეტის წევრებმა „სამხედრო მოსამსახურის სტატუსის შესახებ“ საქართველოს კანონში ცვლილების შეტანის თაობაზე“ კანონპროექტიც განიხილეს, რომელიც თავდაცვის სამინისტროს იურიდიული დეპარტამენტის უფროსმა, ვეფხია გრიგალაშვილმა წარმოადგინა.
კომიტეტის წევრებმა კენჭი უყარეს სხდომაზე წარმოდგენილ საკითხებს და მხარი დაუჭირეს მათ პლენარულ სხდომაზე გატანას.