პარლამენტის დადგენილების შესაბამისად II მოსმენით დაბრუნებული „საერთო სასამართლოების შესახებ“ საქართველოს ორგანულ კანონში ცვლილების შეტანის შესახებ“ კანონპროექტი და მისგან გამომდინარე კანონპროექტთა პაკეტი, იურიდიულ საკითხთა კომიტეტის სხდომაზე მუხლობრივად განიხილეს. საკითხი კომიტეტის წევრებს მთავრობის საპარლამენტო მდივანმა, შალვა თადუმაძემ გააცნო.
საკითხის განხილვისას მომხსენებელმა ყურადღება მხოლოდ იმ მუხლებზე გაამახვილა, რომლებიც იუსტიციის უმაღლესი საბჭოს წევრების არჩევის პროცედურებს განსაზღვრავს და უმრავლესობასა და უმცირესობას შორის დავის საგანს წარმოადგენდა. ცვლილებების თანახმად, პარლამენტი კონკურსის საფუძველზე, ფარული კენჭისყრით იუსტიციის უმაღლესი საბჭოს 6 წევრს ირჩევს, რომლებიც უმაღლესი საგანმანათლებლო დაწესებულებებში მოღვაწე მეცნიერი იურისტებისგან, საქართველოს ადვოკატთა ასოციაციის წევრებისა ან საქართველოს არასამეწარმეო იურიდიული პირების მიერ წარდგენილი პირებისგან შეირჩევა.

ამასთან ერთად ცვლილებები კანდიდატთა არჩევის წესსაც შეეხო, რომლის მიხედვითაც, პარლამენტის რეგლამენტის თანახმად, იუსტიციის უმაღლესი საბჭოს წევრად პარლამენტის კვოტით არჩეული კანდიდატები პარლამენტის სრული შემადგენლობის 2/3-ის უმრავლესობით გამოვლინდება. თუმცა, თუ კენჭისყრის პირველ ტურში ყველა ვაკანსია ვერ შეივსება, კენჭისყრის მომდევნო ტურებში იუსტიციის უმაღლესი საბჭოს წევრი პარლამენტის სრული შემადგენლობის უმრავლესობით გამოვლინდება, ამასთან ასეთი კვორუმით არჩეულ წევრთა რაოდენობა ექვსიდან ოთხს არ უნდა აღემატებოდეს.
კომიტეტის წევრებმა თითოეულ კანონპროექტს ცალ-ცალკე უყარეს კენჭი და მხარი დაუჭირეს II მოსმენით პლენარულ სხდომაზე გატანას.