საქართველოს პრეზიდენტის მიერ პარლამენტისათვის შენიშვნებით დაბრუნებულ კანონპროექტებზე იმსჯელეს დღეს იურიდიულ საკითხთა კომიტეტის სხდომაზე.

საქმე ეხება კანონპროექტებს "საქართველოს სისხლის სამართლის საპროცესო კოდექსში ცვლილების შეტანის შესახებ“, "საერთო სასამართლოების შესახებ“ საქართველოს ორგანულ კანონში ცვლილების შეტანის თაობაზე“, 'საქართველოს საერთო სასამართლოების მოსამართლეთა დისციპლინური პასუხისმგებლობისა და დისციპლინური სამართალწარმოების შესახებ“ საქართველოს კანონში ცვლილების შეტანის თაობაზე“, "იუსტიციის უმაღლესი სკოლის შესახებ“ საქართველოს კანონში ცვლილების შეტანის თაობაზე“ და "საქართველოს სისხლის სამართლის საპროცესო კოდექსში ცვლილების შეტანის შესახებ“, რომლებიც პარლამენტმა 2013 წლის 5 აპრილს მიიღო და ხელმოსაწერად საქართველოს პრეზიდენტს გადაეცა.
კომიტეტის წევრებს საქართველოს პრეზიდენტის შენიშვნები პრეზიდენტის საპარლამენტო მდივანმა დიმიტრი ძაგნიძემ გააცნო. უმრავლესობა პრეზიდენტის შენიშვნებს მხარს არ უჭერს.
იურიდიულ საკითხთა კომიტეტის თავმჯდომარე ვახტანგ ხმალაძის განცხადებით, პარლამენტმა პრეზიდენტის შენიშვნებს მხარი რომ დაუჭიროს, სასამართლო ხელისუფლების დამოუკიდებლობის მექანიზმები კანონითვე შესუსტდება, რისი დაშვებაც არ შეიძლება.
კომიტეტის დასკვნა პარლამენტის ბიუროს წარედგინება და კანონპროექტებზე პრეზიდენტის ვეტოს დაძლევის საკითხს კანონმდებლები უახლოეს სხდომაზე განიხილავენ.