დღის წესრიგის დამტკიცების შემდეგ დეპუტატებს დადგენილი წესის თანახმად, პლენარულ სხდომაზე განცხადებებისთვის დრო დაეთმოთ. საპარლამენტო უმრავლესობის წევრმა, საგარეო ურთიერთობათა კომიტეტის თავმჯდომარის მოადგილემ, ანი მიროტაძემ 27 მაისს რუსეთის ფედერაციის მიერ ოკუპირებული ცხინვალის რეგიონის სოფელ დიცსა და დვანში საოკუპაციო ხაზის გადმოწევისა და ამ ხაზის გასწვრივ მავთულხლართების გავლების ფაქტი დაგმო და განაცხადა, რომ რუსეთის მიერ საოკუპაციო ხაზის გადმოწევამ რეგიონულ სტაბილურობას შესაძლოა, სერიოზული საფრთხე შეუქმნას. "აღნიშნულთან დაკავშირებით გუშინ საგარეო ურთიერთობათა კომიტეტის თავმჯდომარემ თედო ჯაფარიძემ განცხადება გაავრცელა, რომელიც საქართველოში არ იმყოფება. ჩვენ სრულად ვეთანხმებით ამ განცხადებას და კიდევ ერთხელ ვუსვამთ ხაზს, რომ მომხდარზე სრული პასუხისმგებლობა ეკისრება ოკუპანტ სახელმწიფოს - რუსეთის ფედერაციას, რომელიც საერთაშორისო სამართლის ნორმების დარღვევით საქართველოს სამხედრო ოკუპაციას კვლავ აგრძელებს“, - განაცხადა ანი მიროტაძემ. მისი შეფასებით, მომხდარი კიდევ ერთხელ მიუთითებს ოკუპირებულ ტერიტორიებზე არსებულ უკანონობაზე, რამაც სერიოზული საფრთხე შეიძლება შეუქმნას რეგიონულ სტაბილურობას და სამშვიდობო პროცესის სტაბილურად წარმართვას. "ჩვენ მოვუწოდებთ საერთაშორისო თანამეგობრობას, განსაკუთრებული ყურადღება მიაქციოს ამ ფაქტს და მოახდინოს რეაგირება რუსეთის მიერ საქართველოს ოკუპირებულ ტერიტორიაზე გამეფებულ უკანონობაზე, რაც პირდაპირ საფრთხეს უქმნის ოკუპირებულ ტერიტორიებზე მცხოვრებ მშვიდობიან მოსახლეობას. გარდა ამისა, მოვუწოდებთ რუსეთის ფედერაციას, შეასრულოს 2008 წლის 12 აგვისტოს ცეცხლის შეწყვეტის შეთანხმება და ხელი აიღოს საქართველოს ტერიტორიის, ჩვენი ქვეყნის სამხედრო ოკუპაციაზე. ასევე მოვუწოდებთ საგარეო საქმეთა სამინისტროს და ყველა შესაბამის უწყებას, საქართველოს პარლამენტთან მჭიდრო ურთიერთობით და შეთანხმებით, ყველა ბერკეტის გამოყენებით საერთაშორისო თანამეგობრობისა და ჩვენი მეგობარი ქვეყნების მაქსიმალური ინფორმირება მოახდინოს", - აღნიშნა საგარეო ურთიერთობათა კომიტეტის თავმჯდომარის მოადგილემ.

საპარლამენტო უმცირესობის წევრმა, გიორგი გაბაშვილმა თავის გამოსვლაში ივანე მერაბიშვილის დაპატიმრების საკითხზე ისაუბრა და აღნიშნა, რომ "ნაციონალური მოძრაობის" გენერალური მდივანი საპყრობილეში პოლიტიკური ნიშნით იმყოფება. "ალბათ, გადაჭარბებული არ იქნება, თუ ვიტყვი, რომ ბიძინა ივანიშვილის გადაწყვეტილება თავისი უშუალო პოლიტიკური ოპონენტი დაეპატიმრებინა, ახალ პოლიტიკურ რეალობას ქმნის საქართველოში. მიუხედავად იმისა, ვინ როგორ აფასებს ვანო მერაბიშვილის პოლიტიკურ პერსონას ალბათ ხვდებით, რომ მთავარი ოპოზიციური პარტიის გენერალური მდივნის ერთ-ერთი ლიდერის და შესაძლო საპრეზიდენტო კანდიდატის დაპატიმრება მაშინ, როცა ამის არანაირი საფუძველი არ არსებობდა და შეიძლებოდა ამ საკითხზე ისე წარმართულიყო ძიება და ამას არავინ ემალებოდა, არის აშკარა მცდელობა ოპოზიციის ძალისმიერი მეთოდით დასუსტებისა და განადგურებისა. მინდა, ყველას ვუთხრა, რომ ეს მცდელობა არის ამაო“, - განაცხადა გიორგი გაბაშვილმა. მისივე თქმით, გადაწყვეტილება, რომ პოლიტიკური ოპონენტები დააპატიმრონ, გამოიწვევს პრობლემებს როგორც ქვეყნის შიგნით, ასევე ქვეყნის გარეთ. "საქართველოს ყველა მეგობარს ძალიან კარგად ესმის, რომ პოლიტიკური ძალა, რომელიც დღეს ხელისუფლებაშია, დაკავებულია პოლიტიკური ვენდეტით და უფრო მეტიც, არის პირადი ვენდეტის, პირადი შურისძიების სრულიად აშკარა კამპანია", - აღნიშნა გიორგი გაბაშვილმა.
საპარლამენტო უმცირესობის წევრმა, გიორგი ვაშაძემ საკანონმდებლო ორგანოში მასზე განხორციელებული მიყურადების ფაქტის გამოძიება მოითხოვა. "დღეს მე მყავდა დაახლოებით 25 სტუდენტი მოყვანილი პარლამენტში იმისათვის, რომ შევხვედროდი, დამეთვალიერებინა ჩემი სამუშაო ოთახი, პარლამენტი და მინდოდა, უბრალოდ, მესაუბრა მათთან. პირველი, რომ დაცვამ პრობლემა შეგვიქმნა პარლამენტში მოძრაობაზე, მერე კი მომამაგრეს უფორმო, სპეციალური სამსახურის თანამშრომელი, რომელიც გვისმენდა, თუ რაზე ვსაუბრობდით. მან დაგვტოვა მხოლოდ მას შემდეგ, რაც მკაცრი საუბარი მქონდა მასთან“, - განაცხადა გიორგი ვაშაძემ. მისი თქმით, მსგავსი პრეცედენტი პარლამენტში არასდროს ყოფილა და მან აღნიშნული ფაქტის გამოძიება მოითხოვა. "მინდა გთხოვოთ, რომ ეს კონკრეტული ფაქტი გამოიძიოთ პარლამენტში, რომ გვქონდეს მოქალაქეებთან თავისუფლად შეხვედრის, მათთან საუბრის უფლება, არ გვისმენდნენ და გვიყურებდნენ სხვადასხვა ადამიანები პარლამენტში სამუშაო პროცესში", - აღნიშნა საპარლამენტო უმცირესობის წევრმა.
დღეს პარლამენტმა მეორე მოსმენით მიიღო კანონპროექტი "საქართველოს სისხლის სამართლის საპროცესო კოდექსში ცვლილებების შეტანის თაობაზე“, რომელიც ნასამართლობის მოხსნაზე უარის თქმის შემთხვევაში შუამდგომლობის ხელახლა დაყენების ვადის შემცირებას ითვალისწინებს. კანონპროექტის ინიციატორის, პარლამენტის წევრის, ირაკლი ჩიქოვანის განცხადებით, ნასამართლობის მოხსნაზე უარის თქმის შემთხვევაში შუამდგომლობის ხელახლა დაყენება შესაძლებელი იქნება მხოლოდ 3 თვის შემდეგ, ნაცვლად 6 თვისა. მისი განმარტებით, პირს შეეძლება შუამდგომლობით მიმართოს არა მარტო საქმის განმხილველ სასამართლოს, არამედ იმ სასამართლოსაც, რომლის სამოქმედო ტერიტორიაზეც მას გააჩნია მუდმივი საცხოვრებელი ადგილი. წარმოდგენილი ცვლილება გაამარტივებს ნასამართლევ პირთა შემდგომ რესოციალიზაციას.
პლენარულმა სხდომამ პირველი მოსმენით, 79 ხმით, ერთხმად მიიღო კანონპროექტი "სახელმწიფო საიდუმლოების შესახებ“ კანონში ცვლილების შეტანის თაობაზე“. პროექტი არეგულირებს სახელმწიფო საიდუმლოების სხვა სახელმწიფოსათვის გადაცემის შეზღუდვასთან დაკავშირებულ საკითხს. კერძოდ, კანონით გათვალისწინებული აღნიშნული შეზღუდვა არ გავრცელდება საერთაშორისო მშვიდობისა და უსაფრთხოების შენარჩუნებისა და აღდგენის, ან სხვა სახის სამშვიდობო ოპერაციებში მონაწილე ქვედანაყოფების სამხედრო ოპერატიულ-საბრძოლო დავალებებისა და ამოცანების განხორციელების მიზნით გაცვლილ/გადაცემულ სამხედრო დანიშნულების სახელმწიფო საიდუმლოების შემცველ ინფორმაციაზე.

დეპუტატებმა მეორე მოსმენით განიხილეს და 79 ხმით, ერთხმად მიიღეს კანონპროექტი "საქართველოს ადმინისტრაციულ სამართალდარღვევათა კოდექსში ცვლილების შეტანის შესახებ“ და მისი თანმდევი კანონპროექტები, რომელთა ინიციატორიც პარლამენტის წევრი გიორგი ცაგარეიშვილია. კანონპროექტით განისაზღვრება თევზჭერისა და ნადირობის წესების დარღვევისათვის, ასევე ცხოველთა სამყაროს ობიექტებით სხვაგვარი სარგებლობის წესების დარღვევისათვის ჯარიმების ოდენობები, ასევე აღნიშნულ სამართალდაღრვევაზე ოქმის შედგენისა და განხილვის კომპეტენცია.
დღევანდელ სხდომაზე დეპუტატებმა განიხილეს და კენჭი უყარეს შვიდ კანონპროექტს.

მორიგი პლენარულ სხდომა გაიმართება ხვალ, 14:00 საათზე.