ეროვნული მემკივიდრეობის უნიკალური, იშვიათი ბუნებრივი წარმონაქმნებისა და კულტურული არეალების მქონე ტერიტორიების დაცვისა და აღდგენის მიზნით, ბუნების ძეგლების კატეგორიის დაცული ტერიტორიები იქმნება და მათ „ დაცული ტერიტორიების სისტემის შესახებ“ კანონის შესაბამისი კატეგორიის ბუნების ძეგლის სტატუსი ენიჭება. ამის შესახებ პარლამენტის წევრმა, გიორგი ცაგარეიშვილმა ისაუბრა დღეს აგრარულ საკითხთა კომიტეტის სხდომაზე.

როგორც მან აღნიშნა, ყალიბდება ბუნების შემდეგი ძეგლები: ბალდის კანიონის ბუნების ძეგლი, ონიორეს ჩანჩქერის და ტობა პირველის მღვიმის ბუნების ძეგლი, ტობის ჩანჩქერის და არსენ ოქროჯანაშვილის მღვიმის ბუნების ძეგლი, მოთენას მღვიმის ბუნების ძეგლი, მდინარე აბაშის ჩანჩქერის ბუნების ძეგლი, ოჩხომურის ჩანჩქერის ბუნების ძეგლი, ნაზოდელაოს მღვიმის ბუნების ძეგლი, მდინარე აბაშის ჩანჩქერის ბუნების ძეგლი, გოჭკადილის კანიონის ბუნების ძეგლი, გოდერძის ნამარხი ტყის ბუნების ძეგლი, დაშბაშის კანიონის ბუნების ძეგლი, სამშვილდის კანიონის ბუნების ძეგლი, მუხურას ჩანჩქერის ბუნების ძეგლი, ბოდორნის კლდის სვეტების ბუნების ძეგლი, ჯვრის უღელტეხილის ბუნების ძეგლი, ჯვრის უღელტეხილის ტრავერტინის ბუნების ძეგლი და ქეთერისის მინერალური ვოკლუზის ბუნების ძეგლი. 
ცაგარეიშვილის განმარტებით, მუშაობა მიმდინარეობს ფშავ-ხევსურეთის დაცული ტერიტორიის შექმნაზე, რომელსაც არა მარტო გარემოს დაცვითი მნიშვნელობა ექნება, არამედ აღნიშნულ ტერიტორიაზე საქართველოს „მცოცავი საზღვრის“ პრობლემასაც მოხსნის საერთაშორისო ნუსხაში მისი მოხვედრის გზით. „ბუნების ძეგლების შექმნისა და მართვის შესახებ“ კანონპროექტი არეგულირებს ბუნების ძეგლების შექმნასთან დაკავშირებული მიწათსარგებლობის, ნავთობის და გაზის რესურსებით სარგებლობასთან დაკავშირებულ საკითხებს. აგრარულ საკითხთა კომიტეტის წევრებმა ერთხმად დაუჭირეს მხარი გიორგი ცაგარეიშვილის ინიციატივის წესით წარმოდგენილი კანონპროექტის პლენარულ სხდომაზე განხილვისთვის გატანას.