„ადმინისტრაციულ სამართალდარღვევათა კოდექსში“ შესატანი ცვლილებები განიხილეს პირველი მოსმენით დღეს იურიდიულ საკითხთა კომიტეტის სხდომაზე. კანონპროექტი ითვალისწინებს კოდექსის მთელი რიგი მუხლებით დაწესებული პასუხისმგებლობის გადახედვას, ზოგ შემთხვევაში მათ გამკაცრებას, ზოგიერთ შემთხვევაში კი შემსუბუქებას. კერძოდ, ნასვამ მდგომარეობაში სატრანსპორტო საშუალების მართვის შემთხვევაში მკაცრდება ზომები. ასევე 50 ლარით ჯარიმდება იმ სატრანსპორტო საშუალების მძღოლი, რომელსაც მინები დამუქებული აქვს შსს-ს საპატრულო დეპატრამენტის თანხმობის გარეშე, იმავე დარღვევის განმეორების შემთხვევაში ჯარიმა იზრდება 100 ლარამდე, ხოლო წლის განმავლობაში მესამე შემთხვევაში მართვის უფლება ჩამოერთმევა 6 თვის ვადით. ადმინისტრაციული სასჯელი მკაცრდება მთვრალ მდგომარეობაში მანქანის მართვისა და სხვადასხვა საგზაო დარღვევების შემთხვევებში. მკაცრი ადმინისტრაციული სახდელები დაწესდა ალკოჰოლური სასმელებით ვაჭრობის წესების დარღვევისათვის. პასუხისმგებლობა მკაცრდება საზოგადოებრივ ადგილებში ადამიანის ღირსებისა და საზოგადოების ზნეობის შეურაცხმყოფელი ქმედების შემთხვევაში, რაც თავის მხრივ ისეთ ქცევას გულისხმობს, რომელიც ადამიანის უპატივცემულობას გამოხატავს და მის შეურაცხმყოფელ გარემოში ჩაგდებას განაპირობებს. ამაში კი იგულისხმება: სექსუალური ხასიათის ქცევა, საზოგადოებრივ ადგილებში სრული ან ნაწილობრივი უხამსი გაშიშვლება, ფიზიოლოგიური მოთხოვნილებების დაკმაყოფილება. „ადმინისტრაციულ სამართალდარღვევათა კოდექსის“ ახალ რედაქციაში აისახა ასევე არასრულწლოვანის მიერ განხორციელებულ ცრუ შეტყობინებასთან დაკავშირებით მშობლის ადმინისტრაციული პასუხისმგებლობის საკითხი, რაც კოდექსის იმ მუხლში გაიწერება, რომელიც არასრულწლოვანის აღზრდისა და სწავლების მოვალეობის შეუსრულებლობაზე სწორედ მშობლის პასუხისმგებლობას აყენებს. თუმცა ტერორიზმთან დაკავშირებით ცრუ შეტყობინებაზე პასუხისმგებლობის გამკაცრებასთან დაკავშირებით პარლამენტში ცალკე კანონპროექტია ინიცირებული.

კომიტეტმა ხანგრძლივი განხილვის შემდეგ მხარი დაუჭირა გამოთქმული შენიშვნების გათვალისწინებით, კანონპროექტის უახლოეს პლენარულ სხდომაზე გატანას.
დღესვე პირველი მოსმენით განიხილეს კანონპროექტი „სამართალდაცვით სფეროში საერთაშორისო თანამშრომლობის შესახებ“ და „დიპლომატიური სამსახურის შესახებ საქართველოს კანონში ცვლილების შეტანის თაობაზე“. კანონპროექტი დაარეგულირებს იმ საერთაშორისო თანამშრომლობის საკითხებს, რომლებიც უკავშირდება ოპერატიულ-სამძებრო ინფორმაციისა და პერსონალური მოაცემების გაცვლას, ოპერატიულ-სამძებრო ღონისძიებების განხორციელებას და საქართველოს სამართალდამცავი ორგანოების კომპეტენციას მიკუთვნებულ სხვა სფეროებს, რომლებსაც საქართველოს სამართალდამცავი ორგანოები წარმართავენ სხვა ქვეეყნის სამართალდამცავ ორგანოებთან ან საერთაშორისო ორგანიზაციების შესაბამის სტრუქტურებთან.
კანონპროექტი ასევე ითვალისწინებს საქართველოს შინაგან საქმეთა სამინისტროს წარმომადგენლებისათვის „პოლიციის (უსაფრთხოების) ატაშესა“ და „მეკავშირე ოფიცრისათვის“ დიპლომატიური სტატუსის მინიჭებას.
კომიტეტმა მეორე მოსმენით მუხლობრივად განიხილა კანონპროექტები „სახელმწიფო საიდუმლოების შესახებ“ კანონში ცვლილებების შეტანის თაობაზე და „საქართველოს მოქალაქეთა და საქართველოში მცხოვრებ უცხოელთა რეგისტრაციის, პირადობის (ბინადრობის) მოწმობისა და საქართველოს მოქალაქის პასპორტის გაცემის წესის შესახებ“ კანონში ცვლილებების შეტანის შესახებ, ასევე „იარაღის შესახებ“ კანონში შესატანი ცვლილებები.
კომიტეტის წევრებმა მხარი დაუჭირეს წარმოდგენილი კანონპროექტების პლენარულ სხდომაზე განსახილველად გატანას.