არანაკლებ 30 000 ამომრჩევლის ინიციატივით "საცხოვრებელი სადგომით სარგებლობისას წარმოშობილი ურთიერთობების შესახებ" საქართველოს კანონში ცვლილებების შეტანის შესახებ" კანონის პროექტის წარდგენის უფლების განხორციელების მიზნით მოქალაქეთა საინიციატივო ჯგუფს რეგისტარაციაზე უარი ეთქვა საპროცედურო საკითხთა და წესების კომიტეტის დღევანდელ სხდომაზე. კომიტეტის თვმჯდომარემ, ხათუნა გოგორიშვილმა საინიციატივო ჯგუფის წევრებს განუცხადა, რომ უარის მიზეზი პარლამენტის რეგლამენტის მოთხოვნების შეუსრულებლობაა, კერძოდ დარღვეულია საინიციატივო ჯგუფის წევრთა რაოდენობისა და მათი წარდგენის მოთხოვნები, საინიციატივო ჯგუფს არ მიუმართავს პარლამენტის ბიუროსთვის და წერილს არ ახლავს კანონპროექტი.

კომიტეტმა ერთხმად დაუჭირა მხარი მეორე საინიციატივო ჯგუფის მიერ წარმოდგენილი საინიციატივო წინადადების დარეგისტრირების საკითხს არანაკლებ 30 000 ამომრჩევლის ინიციატივით "მაუწყებლობის შესახებ" საქართველოს კანონში ცვლილებების შეტანის შესახებ" კანონის პროექტის წარდგენის უფლების განხორციელების თაობაზე. კომიტეტმა მეორე მოსმენით, მუხლობრივად განიხილა პარლამენტის წევრის, ზვიად კუკავას საკანონმდებლო ინიციატივა საქართველოს პარლამენტის რეგლამენტის პროექტი – "საქართველოს პარლამენტის რეგლამენტში ცვლილების შეტანის შესახებ", რომელიც ითვალისწინებს, რომ პარლამენტის დარგობრივი ეკონომიკისა და ეკონომკური პოლიტიკის კომიტეტში შეიქმნას მარეგულირებელ ორგანოსთან არსებული მომხმარებელთა ინტერესების დამცველის შესარჩევი საკონკურსო კომისია, არანაკლებ 12 წევრის შემადგენლობით, ასევე დგინდება საკონკურსო პირობები. ხათუნა გოგორიშვილმა მესამე მოსმენით განსახილველად წარადგინა თავისივე კომიტეტის მიერ ინიცირებული კანონპროექტი "საქართველოს პარლამენტის რეგლამენტის" პროექტისა და მისგან გამომდინარე საქართველოს კანონების პროექტების: "საპარლამენტო ფრაქციის შესახებ" საქართველოს კანონში ცვლილების შეტანის თაობაზე", "საქართველოს პარლამენტის წევრის სტატუსის შესახებ" საქართველოს კანონში ცვლილების შეტანის თაობაზე", "ნორმატიული აქტების შესახებ" საქართველოს კანონში ცვლილების შეტანის თაობაზე" , მომხსენებლის განმარტებით პროექტის საბოლოო ვარიანტში გათვალისწინებულია პლენარულ სხდომაზე მეორე მოსმენისას ქრისტიან–დემოკრატების და სხვა კოლეგების, ასევე ახალგაზრდა იურისტთა ასოციაციის წარმომადგენელთა მიერ გამოთქმული შენიშვნები. მომხსენებლის განცხადებით ამით დასრულდა კანონპროექტზე ინტენსიური და შრომატევადი ათთვიანი მუშაობა და კანონპროექტი მესამე მოსმენით განსახილველად წარედგინება პლენარულ სხდომას.

კომიტეტის წევრებმა მხარი დაუჭირეს განხილულ საკითხებს.