დიდი ბრიტანეთი საქართველოს კიდევ ერთხელ უდასტურებს მხარდაჭერას ევროკავშირსა და ნატო-ში გაწევრიანების გზაზე. ამის შესახებ ითქვა პარლამენტის თავმჯდომარის დავით უსუფაშვილის შეხვედრაზე დიდი ბრიტანეთის საგარეო ოფისის აღმოსავლეთ ევროპისა და ცენტრალური აზიის დეპარტამენტის დირექტორთან, კოლინ რობერტსთან.

გენდერული თანასწორობის სახელმწიფო პოლიტიკა - ამ თემაზე პარლამენტის გენდერული თანასწორობის საბჭომ დღეს დაიწყო შეხვედრების ციკლი, რომელიც სამ დღეს გაგრძელდება. იგი მიზნად ისახავს საკანონმდებლო დონეზე ქალთა პოლიტიკური მონაწილეობის წახალისებას, რაც გულისხმობს ქალთა ფართო წარმომადგენლობას ადგილობრივ თვითმმართველობებში, ასევე კვოტური სისტემის შემოღებას არჩევით თანამდებობებსა და პოლიტიკური პარტიების სიებში ქალთა რაოდენობის გაზრდის მიზნით. იგეგმება გენდერული თანასწორობის უზრუნველსაყოფად განსახორციელებელი ეროვნული სამოქმედო გეგმის შემუშავება.