დღეს ადამიანის უფლებათა დაცვისა და სამოქალაქო ინტეგრაციის კომიტეტის წევრებმა სახალხო დამცველის 2012 წლის ანგარიში მოისმინეს. სხდომაზე კომიტეტის შემადგენლობიდან ნაციონალური მოძრაობის 4 წევრი არ ესწრებოდა, რომლებმაც 19 აპრილს დაგეგმილი აქციის გამო საპარლამენტო საქმიანობაზე ორი დღით უარი განაცხადეს. „ჩვენ გვსურდა სახალხო დამცველის ანგარიში ღია სხდომაზე ოპოზიციასთან ერთად განგვეხილა. დღეს სახალხო დამცველის ანგარიშის ნაწილს მოვისმენთ, ხოლო მეორე ნაწილზე თვის ბოლოს, შემაჯამებელ სხდომაზე, უმცირესობასთან ერთად ვიმსჯელებთ“,- განაცხადა კომიტეტის თავმჯდომარემ, ეკა ბესელიამ.

“ევროპაში დიდია ინტერესი საქართველოსადმი და ქვეყანაში მიმდინარე პროცესებისადმი. უაღრესად დიდ ინტერესს იწვევს უშუალოდ პრემიერ-მინისტრის პიროვნება, მისი პოლიტიკური შეხედულებები, სწორედ ამიტომ მომავალ კვირას მოუთმენლად ელიან ევროპის საბჭოში მის პირველ გამოსვლას და არა მხოლოდ იქ, ასევე დიდი ინტერესია ევროპარლამენტში, კერძოდ, ევროპარლამენტის საგარეო საქმეთა კომიტეტის მხრიდან.”-აცხადებს საქართველოს პარლამენტის საგარეო ურთიერთობათა კომიტეტის თავმჯდომარე თედო ჯაფარიძე, რომელმაც ევროპარლამენტში ევროპასთან ინტეგრაციის კომიტეტის თავმჯდომარესთან ერთად 4 დღიანი სამუშაო ვიზიტი დაასრულა.