დეპუტატმა ბიძინა გეგიძემ  პარლამენტის პლენარულ სხდომაზე მოსამართლეების უვადოდ დანიშვნის შეჩერების შესახებ კანონპროექტის განხილვისას აღნიშნა, რომ პროცესი არაჯანსაღია და საჭიროა ისეთი რეალობის შექმნა, რაც უზრუნველყოფს სასამართლოს დამოუკიდებლობასა და სასამართლოს მიმართ ნდობის აღდგენას. 

„უკვე 2 თვე გავიდა, რაც აქტიური კამათი მიდის სასამართლო სისტემაში პროცესის გაჯანსაღებასთან დაკავშირებით, თუმცა, ამ 2 თვის მანძილზე პრობლემა იმავე წერტილშია, საიდანაც დაიწყო. ჩვენ ისევ ბევრი კითხვა გვაქვს, საზოგადოებაში არის ნდობის დეფიციტი მართლმსაჯულების მიმართ. გაუაზრებელი რიტორიკა კი ამ კითხვებსა და უნდობლობას ვერ აქარწყლებს.

საკანონმდებლო ინიციატივა, რომელიც ითვალისწინებს მოსამართლეთა უვადოდ დანიშვნაზე მორატორიუმის გამოცხადებას, არის პრაგმატული, სამართლიანი და კონსტიტუციურიც, გამომდინარე იქიდან, რომ დღეს, ჩვენი ამომრჩეველი განიცდის ნდობის დეფიციტის მართლმსაჯულების სისტემის მიმართ. ყველამ გავიაზროთ სად ვართ მისული, რას ელოდება ჩვენგან ამომრჩეველი.

შეფუთვის მცდელობა და კონსტიტუციით აპელირება, თითქოს ინიციატივამ ე.წ. კონსტიტუციური ტესტი ვერ გაიარა, ვერანაირად ვერ იქნება თვითკმარი, რადგან ეს პროცესი არის პოლიტიკური და არა მხოლოდ სამართლებრივი. პოლიტიკურია იმიტომ, რომ სასამართლოს მიმართ ნდობის აღდგენა, ჯერ-ჯერობით, ვერ მოვახერხეთ. მე მხარს ვუჭერს კანონპროექტს, რომელიც უნდა იქცეს კანონად, საიდანაც უნდა დაიწყოს სასამართლოს დამოუკიდებლობა და ნდობის გაჩენა,“ - განაცხადა ბიძინა გეგიძემ.