საქართველოს პრემიერ-მინისტრი ირაკლი ღარიბაშვილი 30 ივნისს პარლამენტს სამთავრობო პროგრამის შესრულების მიმდინარეობის შესახებ მოხსენებას წარუდგენს, - ამის შესახებ პარლამენტის თავმჯდომარე შალვა პაპუაშვილმა ბიუროს სხდომაზე განაცხადა.

 

ბიურომ 27 - 30 ივნისის პლენარული სხდომების დღის წესრიგი განსაზღვრა, რომლის თანახმად მიმდინარე სასესიო კვირას განსახილველი 100-ზე მეტი საკითხია.

 

დაგეგმილია პარლამენტის რეგლამენტში შესატანი ცვლილებების მესამე მოსმენით განხილვა. პროექტის თანახმად, ახლებურად განისაზღვრება: პარლამენტის თავმჯდომარის მოადგილის და კომიტეტის თავმჯდომარის მოადგილის არჩევის პროცედურა და კანდიდატურების წარდგენის ვადა; საგამოძიებო მოქმედებათა ჩატარების თაობაზე საქართველოს გენერალური პროკურორის წინადადების საფუძვლიანობის შესწავლა-განხილვის საკითხი; საქართველოს მოქალაქის ლობისტად რეგისტრაცია; პარლამენტის მიერ პარლამენტის ბიუროს გადაწყვეტილების გაუქმების პროცედურა; პარლამენტის ყოფილი წევრების პარლამენტის შენობაში შესვლის უფლება; საინიციატივო ჯგუფების მიერ წარმოდგენილი განცხადების და კანონპროექტის რეგისტრაცია და ინფორმაციის ვებგვერდზე განთავსება.

 

ბიურომ მხარი დაუჭირა ახალი საპარლამენტო პოლიტიკური ჯგუფი „თავისუფლების“ რეგისტრაციას, რომლის წევრებიც არიან - როსტომ ჩხეიძე და ნატო ჩხეიძე.