საქართველოს პარლამენტის განათლების, მეცნიერებისა და ახალგაზრდულ საქმეთა კომიტეტმა მეორე მოსმენით, დაჩქარებული წესით განიხილა საქართველოს მთავრობის მიერ საკანონმდებლო ინიციატივის წესით წარმოდგენილი საქართველოს კანონის პროექტი „ზოგადი განათლების შესახებ“ საქართველოს კანონში ცვლილების შეტანის თაობაზე“ საქართველოს კანონში ცვლილების შეტანის შესახებ“.

ცვლილებები კომიტეტის სხდომაზე განათლების, მეცნიერებისა და ახალგაზრდობის მინისტრის მოადგილემ, თამარ მახარაშვილმა წარადგინა.

კანონპროექტი 2026-2027 და 2027-2028 სასწავლო წლების დასაწყისისთვის, ცალკეული კლასებისა და საგნებისთვის სამინისტროს მიერ შექმნილი სახელმძღვანელოების სასწავლო პროცესში ეტაპობრივად დანერგვას ითვალისწინებს.

განათლების, მეცნიერებისა და ახალგაზრდულ საქმეთა კომიტეტის წევრებმა ასევე მეორე მოსმენით, დაჩქარებული წესით განიხილეს „ზოგადი განათლების შესახებ“ კანონში ცვლილებები, რომლებიც მასწავლებლის/სპეციალური მასწავლებლის განათლებისთვის შესაბამისი მოთხოვნების დადგენას შეეხება.

ცვლილების თანახმად, სკოლაში დასაქმების შესაძლებლობა მიეცემათ იმ პირებსაც, რომლებსაც ინფორმაციისა და კომუნიკაციის ტექნოლოგიების მიმართულებით პროფესიული განათლება აქვთ. ამასთან, სწავლების ხარისხის უზრუნველყოფის მიზნით, ასეთი პირებისთვის სავალდებულო გახდება მასწავლებლობის მაძიებლობის პროგრამის ან მასწავლებლის მომზადების შესაბამისი საგანმანათლებლო პროგრამის გავლა, კანონმდებლობით დადგენილი წესით.

გარდა ამისა, მასწავლებლობის მაძიებლობის პროგრამაში ჩართვის საშუალება ექნება ნებისმიერ პირს, რომელსაც აქვს მინიმუმ ბაკალავრის აკადემიური ხარისხი, თუმცა, თუ მისი კვალიფიკაცია არ არის იმ საგნის შესაბამისი, რომლის სწავლებაც სურს, ვალდებული გახდება, მასწავლებლობის მაძიებლობის პროგრამაში ჩართვის წინაპირობად შესაბამისი საგნის კომპეტენცია დაადასტუროს.

ცვლილებების თანახმად, შესაძლებელი იქნება სკოლაში დროებით არმყოფი სპეციალური მასწავლებლის შეცვლა.

კომიტეტის სხდომაზე ასევე განიხილეს საქართველოს მთავრობის მიერ რატიფიცირებისთვის წარმოდგენილი „2022 წლის 15 ნოემბრის „საფრანგეთის განვითარების სააგენტოსა (გამსესხებელი) და საქართველოს (მსესხებელი) შორის საკრედიტო რესურსის ჩარჩოშეთანხმების“ N1 ცვლილება“, რომელიც ფინანსთა მინისტრის პირველმა მოადგილემ, გიორგი კაკაურიძემ წარადგინა.

გიორგი კაკაურიძის ინფორმაციით, 2022 წელს ხელი მოეწერა საქართველოსა და რეკონსტრუქციისა და განვითარების საერთაშორისო ბანკს (IBRD) შორის სასესხო შეთანხმებას, რომლის ფარგლებშიც, IBRD-მა საქართველოს სესხის სახით გამოუყო 358.500.000 ევროს ოდენობის ფინანსური რესურსი. პროგრამის მიზანია ადმინისტრაციული კაპიტალის მართვისა და განათლების, ჯანდაცვისა და სოციალური დაცვის სფეროებში მიმდინარე რეფორმების მხარდაჭერა.

ფინანსთა მინისტრის პირველი მოადგილის თქმით, საფრანგეთის განვითარების სააგენტომ, აღნიშნული პროგრამის განსახორციელებლად, საქართველოს დამატებით 100 მილიონი ევროს ოდენობის სასესხო რესურსი გამოუყო. მისი განცხადებით, 50 მილიონი ევრო დაუყოვნებლივ გააქტიურდა, დარჩენილი 50 მილიონი ევროს გააქტიურება კი 2025 წელს იყო დაგეგმილი. თუმცა, რეფორმის დეტალებთან დაკავშირებით მიმდინარე მოლაპარაკებების გამო, ეს ვერ მოხერხდა. აღნიშნული თანხის ათვისების ვადა 2025 წლის 15 ნოემბერს ამოიწურა, რის გამოც ხელშეკრულებაში ცვლილება შედის და ვადა 2026 წლის 15 აგვისტომდე გახანგრძლივდება. ეს საქართველოს შესაძლებლობას მისცემს, უახლოეს პერიოდში გაააქტიუროს დარჩენილი 50 მილიონი ევრო.

განათლების, მეცნიერებისა და ახალგაზრდულ საქმეთა კომიტეტმა მხარი დაუჭირა სხდომაზე განხილულ საკითხებს.