განათლების, მეცნიერებისა და კულტურის კომიტეტის თავმჯდომარე გენადი მარგველაშვილი, განათლების, მეცნიერების, კულტურისა და სპორტის მინისტრთან, მიხეილ ჩხენკელთან ერთად ფიზიკისა და ინფორმატიკის საერთაშორისო ოლიმპიადიდან 16 მედლით დაბრუნებულ მოსწავლეებსა და მათ პედაგოგებს შეხვდა.

„საამაყოა ის ფაქტი, რომ 2020 წლის 8-12 იანვარს ქალაქ ალმატაში გამართულ ჟაუტიკოვის მე-16 საერთაშორისო ოლიმპიადიდან, რომელშიც 21 ქვეყნის 600 მოსწავლე მონაწილეობდა, ქართველი მოსწავლეები უპრეცედენტო შედეგებით დაბრუნდნენ. მათ 16 მედალი მოიპოვეს: 3 ოქრო, 5 ვერცხლი და 8 ბრინჯაო. მინდა, ეს გამარჯვება თითოეულ გამარჯვებულს, ასევე მათ მასწავლებლებს მივულოცო. ქართული ფიზიკა-მათემატიკური სკოლა ჩვენი ქვეყნის სავიზიტო ბარათი იყო ყოველთვის და ეს ტენდენცია უნდა შევინარჩუნოთ. ამაში შეიტანს უდიდეს წვლილს ქუთაისის საერთაშორისო უნივერსიტეტი, რომელიც ნიჭიერი ახალგაზრდებისთვის ძალიან დიდი ასპარეზი იქნება“, - განაცხადა გენადი მარგველაშვილმა.

მისი თქმით, აღსანიშნავია ის ფაქტი, რომ მწვრთნელებს შორის გამართულ შეჯიბრში პირველი ადგილი ქართველმა პედაგოგებმა - ლელა მამულაშვილმა და მიხეილ სოხაშვილმა მოიპოვეს. მესამე ადგილი კი ვახტანგ შეკიშვილმა, ლუკა ხიზანიშვილმა და თეიმურაზ კალატოზმა გაინაწილეს.

გენადი მარგველაშვილმა მადლობა გადაუხადა გამარჯვებულებს და წარმატება უსურვა სამომავლო საქმიანობაში.