გენადი მარგველაშვილი: „ხარისხიანი სკოლამდელი განათლების მიღება მნიშვნელოვანია, განათლების შემდგომ საფეხურებზე, როგორც აკადემიური ისე სოციალური წარმატებისათვის
განათლების, მეცნიერებისა და კულტურის კომიტეტმა ხარისხიან სკოლამდელ განათლებაზე ყველა ბავშვის თანაბარი ხელმისაწვდომობის შესწავლასთან დაკავშირებით შექმნილი თემატური მოკვლევის ჯგუფის შეხვედრა აღნიშნული საკითხით დაინტერესებულ პირებთან გამართა.
შეხვედრა დისტანციურ რეჟიმში მიმდინარეობდა.
შეხვედრას ესწრებოდნენ მუნიციპალიტეტების ბაგა ბაღების გაერთიანებების, არასამთავრობო და საერთაშორისო ორგანიზაციების წარმომადგენლები.
კომიტეტის თავმჯდომარის, გენადი მარგველაშვილის განცხადებით, ხარისხიანი სკოლამდელი განათლება ბავშვს შესაძლებლობას აძლევს ისწავლოს ცვლილებების მიმართ ადაპტაცია, გამოიმუშაოს შესაბამისი უნარები, თუ როგორ დაძლიოს პრობლემები. სკოლამდელი აღზრდის როლი ბავშვის ცხოვრებაში ძალიან მნიშვნელოვანია.
„ხარისხიანი სკოლამდელი განათლების მიღება, განათლების შემდგომ საფეხურებზე სკოლასა თუ უნივერსიტეტში მნიშვნელოვანია, როგორც აკადემიური ისე სოციალური წარმატებისათვის”, - განაცხადა გენადი მარგველაშვილმა.
შეხვედრაზე განიხილეს სკოლამდელი განათლების ხელმისაწვდომობის რეკომენდაციები. შეხვედრაში მონაწილეებმა ისაუბრეს სკოლამდელი აღზრდის დაწესებულებებში არსებულ მდგომარეობაზე, გამოწვევებზე, პრობლემების გადაჭრის გზებზე .
თემატური მოკვლევის მხარდამჭერია USAID-ის პროგრამა დემოკრატიული მმართველობის ინიციატივაა.
საქართველოს პარლამენტის განათლების, მეცნიერებისა და კულტურის კომიტეტმა 2020 წლის სამოქმედო გეგმაში ერთ-ერთ პრიორიტეტულ მიმართულებად განსაზღვრა ხარისხიანი სკოლამდელი განათლების თანაბარი ხელმისაწვდომობის კუთხით არსებული მდგომარეობის შესწავლა.
აღნიშნული მიზნის მისაღწევად, კომიტეტი იყენებს საქართველოს პარლამენტის რეგლამენტით განსაზღვრულ ინსტრუმენტს - თემატურ მოკვლევას.
მისი მიზანია ყველა ბავშვისთვის ხარისხიანი სკოლამდელი განათლების ხელმისაწვდომობის უზრუნველყოფის პროცესში არსებული გამოწვევების გამოვლენა;„ადრეული და სკოლამდელი აღზრდისა და განათლების შესახებ“ საქართველოს კანონის აღსრულების კუთხით არსებული მდგომარეობის შეფასება; მოკვლევის პერიოდში მიღებული ინფორმაციის ანალიზის საფუძველზე დოკუმენტურად დასაბუთებული დასკვნის მომზადება; გამოვლენილი გამოწვევების საპასუხო ქმედითი ნაბიჯების გადადგმის მიზნით, შესაბამისი უწყებებისათვის რეკომენდაციის გაცემა.
