გარემოს დაცვისა და ბუნებრივი რესურსების კომიტეტის თავმჯდომარის მოადგილე გიორგი ხახუბია სსიპ ბირთვული და რადიაციული უსაფრთხოების სააგენტოს 10 წლის იუბილეს დაესწრო.

გიორგი ხახუბიამ მოწვეულ სტუმრებს სიტყვით მიმართა და ხაზი გაუსვა გარემოს დაცვისა და ბუნებრივი რესურსების კომიტეტი აქტიურ ჩართულობას ბირთვული და რადიაციული უსაფრთხოების სფეროს კანონმდებლობისა და არსებული რეგულაციების დახვეწაში.

„ჩვენი კომიტეტი აქტიურად მუშაობს ბირთვული და რადიაციული უსაფრთხოების სფეროში შესაბამისი კანონმდებლობის ფორმირებასა და არსებული რეგულაციების დახვეწაზე, რათა მეტად ეფექტიანად მოხდეს ამ სფეროში არსებული საკითხების მართვა. განსაკუთრებით აღსანიშნავია 2023 წელს განხორციელებული რეფორმა, როდესაც მიღებულ იქნა ახალი კანონი „რადიაციული დაცვის, ბირთვული უსაფრთხოებისა და დაცულობის შესახებ“. აღნიშნული ცვლილებები ემსახურებოდა საერთაშორისო ვალდებულებების შესრულებას და თანამედროვე სტანდარტებთან შესაბამისობის უზრუნველყოფას. მინდა, აღვნიშნო, რომ ბოლო 10 წლის განმავლობაში ჩვენ მიერ განხორციელებული საკანონმდებლო ცვლილებები და სააგენტოს საქმიანობა ემსახურებოდა ადამიანის ჯანმრთელობის, გარემოსა და საზოგადოებრივი უსაფრთხოების მაღალ დონეზე დაცვას“, - განაცხადა გიორგი ხახუბიამ.

მან ბირთვული და რადიაციული უსაფრთხოების სააგენტოს თითოეულ თანამშრომელს იუბილე მიულოცა და ასევე გადასცა საქართველოს პარლამენტის გარემოს დაცვისა და ბუნებრივი რესურსების კომიტეტის თავმჯდომარის მაია ბითაძის მილოცვა, რომელიც საქართველოში არ იმყოფება და ვერ მოახერხა ღონისძიებაზე დასწრება.

საიუბილეო ღონისძიების მონაწილეებს სიტყვით გარემოს დაცვისა და სოფლის მეურნეობის მინისტრმა დავით სონღულაშვილმა და განათლების, მეცნიერებისა და ახალგაზრდობის მინისტრმა გივი მიქანაძემ მიმართეს, რომლებმაც სააგენტოს საქმიანობის როლსა და მნიშვნელობაზე ისაუბრეს.

ღონისძიებაზე საკანონმდებლო და აღმასრულებელი ხელისუფლების წარმომადგენლებმა დარგის განვითარებაში შეტანილი წვლილისთვის უმაღლესი საგანმანათლებლო დაწესებულებების რექტორები, სამედიცინო კლინიკების და ცენტრების ხელმძღვანელები და სააგენტოს დამსახურებული თანამშრომლები მადლობის სიგელებით დააჯილდოვეს.