პარლამენტის ეკონომიკური პოლიტიკის კომიტეტის თავმჯდომარის პირველი მოადგილე, უნგრეთის პარლამენტთან მეგობრობის ჯგუფის ხელმძღვანელი ირაკლი მეზურნიშვილი და ეკონომიკური პოლიტიკის კომიტეტის თავმჯდომარის მოადგილე გიორგი ბარვენაშვილი უნგრეთში ვიზიტით იმყოფებიან.

როგორც ირაკლი მეზურნიშვილმა განაცხადა, უნგრეთში საქართველოს დელეგაციამ, რომელსაც დედაქალაქის მერი კახა კალაძე ხელმძღვანელობს, წარმატებული შეხვედრები გამართა.

„უნგრეთი ჩვენი ქვეყნის მნიშვნელოვანი პარტნიორი და დიდი მეგობარია. ორ ქვეყანას შორის არსებული ეკონომიკური ურთიერთობა კიდევ უფრო მეტად უნდა გაღრმავდეს. აღსანიშნავია, რომ ევროკავშირში ჩვენ ასეთი მხარდამჭერი გვყავს“, - აღნიშნა ირაკლი მეზურნიშვილმა.

საქართველოს დელეგაციამ მონაწილეობა მიიღო საერთაშორისო კონფერენციაში, სადაც წამყვანმა ევროპულმა ქალაქებმა ერთმანეთს ურბანულ განვითარებაში საკუთარი გამოცდილება გაუზიარეს.

დელეგაციის წევრებმა შეხვედრები გამართეს უნგრეთის საგარეო საქმეთა მინისტრ პიტერ სიიარტოსთან და უნგრეთის პარლამენტის წევრ გაბორ კუბატოვთან.