ირინე ფრუიძე: „ახალგაზრდების ჩართულობა და მათი ინფორმირებულობა ძალიან მნიშვნელოვანია პარლამენტის იმიჯის ამაღლებისთვის და მის მიმართ ნდობის გაზრდისთვის“
ევროპასთან ინტეგრაციის კომიტეტის თავმჯდომარის პირველი მოადგილე ირინე ფრუიძე საქართველოს სტუდენტური პარლამენტის წევრებს შეხვდა. შეხვედრაზე ევროპასთან ინტეგრაციის თაობაზე, ქვეყნის საგარეო კურსის შესახებ და ტერიტორიული მთლიანობის საკითხთან დაკავშირებით ისაუბრეს.
დეპუტატმა განსაკუთრებული ყურადღება ევროპასთან ინტეგრაციის კომიტეტის საქმიანობაზე გაამახვილა. მან ისაუბრა ასოცირების შეთანხმებისა და ღრმა და ყოვლისმომცველი სავაჭრო ხელშეკრულების პროცესში საშინაო პოლიტიკის სფეროში შესასრულებელ ამოცანებზე, ქვეყანაში განხორციელებულ და განსახორციელებელ რეფორმებზე. მისი თქმით, ამ გზაზე მნიშვნელოვანია დემოკრატიული ინსტიტუტების გაძლიერება და ეკონომიკური განვითარება, რაც ყველა სახელმწიფო ინსტიტუტის აქტიურ ჩართულობას მოითხოვს. ირინე ფრუიძემ ისაუბრა ღია მმართველობის მუდმივმოქმედი საპარლამენტო საბჭოსა და გენდერული თანასწორობის საბჭოს საქმიანობაზე.
შეხვედრაზე დეპუტატმა განსაკუთრებული ყურადღება საპარლამენტო პროცესებში ახალგაზრდობის ჩართულობის მნიშვნელობაზე გაამახვილა.
„ახალგაზრდების ჩართულობა და მათი ინფორმირებულობა ძალიან მნიშვნელოვანია პარლამენტის იმიჯის ამაღლებისთვის და მის მიმართ ნდობის გაზრდისთვის. ჩვენ ბევრი ახალი ინსტრუმენტი შევქმენით პარლამენტის საქმიანობაში მოქალაქეების ჩართვის ხელშესაწყობად და მნიშვნელოვანია, რომ საზოგადოებამ, განსაკუთრებით ახალგაზრდობამ ამის შესახებ იცოდეს“, - განაცხადა ირინე ფრუიძემ.
