პარლამენტში მიმდინარე რეგიონული კონფერენციის - „საპარლამენტო ზედამხედველობა: ანგარიშვალდებულების მოთხოვნის უფლებამოსილება“ ფარგლებში, გაიმართა ღონისძიება თემაზე: „პარლამენტების გაძლიერება კეთილსინდისიერების მექანიზმების საშუალებით“, რომლის ორგანიზატორი იყო ეუთოს დემოკრატიული ინსტიტუტებისა და ადამიანის უფლებების ოფისი (OSCE/ODIHR).

ღონისძიებაზე გაიმართა დისკუსია, რომელიც შეეხებოდა ეროვნულ დონეზე პარლამენტების მიერ კეთილსინდისიერების მექანიზმის შემუშავებისა და განხორციელებისთვის გადადგმულ ნაბიჯებს და რეფორმებს.
 
საქართველოს პარლამენტის წევრმა, ირინე ფრუიძემ ღონისძიების მონაწილეებს ის გამოცდილება გააცნო, რომელიც საქართველოს პარლამენტს ეთიკის კოდექსის შემუშავებისა და მიღების კუთხით აქვს. 

ირინე ფრუიძემ დეტალურად ისაუბრა: ეთიკის კოდექსის პრინციპებზე, კოდექსში გაწერილი ქცევის წესებზე, მათ შორის, პარლამენტის წევრის მიერ საჩუქრის მიღებასთან და ლობისტურ საქმიანობასთან დაკავშირებულ საკითხებზე. 

საქართველოს პარლამენტის წევრმა ყურადღება გაამახვილა კოდექსის დარღვევის შემთხვევების მონიტორინგზე და კოდექსის აღსრულების მექანიზმის - ეთიკის საბჭოს საქმიანობაზე. 

„შეხვედრის მონაწილეები გაეცნენ საქართველოს პარლამენტის გამოცდილებას და ინტერესი გამოხატეს, რომ მსგავსი ინსტრუმენტი თავიან პარლამენტებშიც დანერგონ“, -განაცხადა შეხვედრის კომენტირებისას ირინე ფრუიძემ. 

ღონისძიებაში მონაწილეობდნენ: საქართველოს პარლამენტის წევრი გუგული მაღრაძე, აღმოსავლეთ პარტნიორობის სხვა წევრი ქვეყნების და ცენტრალური აზიის ქვეყნების პარლამენტის წევრები, ასევე, სამოქალაქო საზოგადოების, ეუთოს/დემოკრატიული ინსტიტუტებისა და ადამიანის უფლებების ოფისის და საერთაშორისო ორგანიზაციების წარმომადგენლები.