ქალთა მიმართ ძალადობის წინააღმდეგ ბრძოლის 16-დღიანი კამპანიის ფარგლებში, თბილისის კლასიკურ გიმნაზიაში, ქალთა და ბავშვთა საკითხებზე მომუშავე საქართველოს პარლამენტის დროებითი კომისიის შეხვედრა გაიმართა.

ღონისძიების ფარგლებში სკოლის მოსწავლეებს ჩაუტარდათ ტრენინგი თემაზე: „კიბერბულინგი და ონლაინ სივრცეში ძალადობა“. განსაკუთრებული ყურადღება გამახვილდა ქალთა და ბავშვთა მიმართ ძალადობაზე.

„ციფრულ სივრცეში ძალადობასთან დაკავშირებით ახალგაზრდებში ცნობიერების ამაღლება გვსურს. ისინი ყველაზე მეტად არის ჩართული ონლაინ სამყაროში და შესაბამისად, ყველაზე მოწყვლადი სხვადასხვა სახის ონლაინ ზეწოლისა და ძალადობის მიმართ. ახალგაზრდების განათლება, ინფორმირება და გაძლიერება არის აუცილებელი ნაბიჯი უსაფრთხო ციფრული გარემოს შესაქმნელად“, - განაცხადა ქალთა და ბავშვთა საკითხებზე მომუშავე საქართველოს პარლამენტის დროებითი კომისიის წევრმა რიმა ბერაძემ.

ტრენინგზე, რომელსაც შინაგან საქმეთა სამინისტროს ადამიანის უფლებათა დაცვის დეპარტამენტის წარმომადგენლები უძღვებოდნენ, ახალგაზრდები გაეცნენ უსაფრთხო ონლაინ კომუნიკაციის წესებს და მიიღეს რჩევები, როგორ დაიცვან თავი ონლაინ სივრცეში ძალადობისგან.

„ახალგაზრდები გაეცნენ ონლაინ სივრცეში კიბერდანაშაულის ნაირსახეობებს. მიიღეს ინფორმაცია თუ როგორ უნდა დაიცვან თავი ციფრულ სივრცეში, ვის უნდა მიმართონ ბულინგის, ზეწოლის თუ შანტაჟის შემთხვევაში. მსგავსი ტიპის შეხვედრები მომავალშიც გაგრძელდება“, - განაცხადა ქალთა და ბავშვთა საკითხებზე მომუშავე საქართველოს პარლამენტის დროებითი კომისიის წევრმა ვლადიმერ ბოჟაძემ.