სრულიად საქართველოს კათოლიკოს-პატრიარქის, მცხეთა-თბილისის მთავარეპისკოპოსის, ბიჭვინთისა და ცხუმ-აფხაზეთის მიტროპოლიტის, უწმინდესისა და უნეტარესის ილია მეორის აღსაყდრებიდან 35-ე და დაბადებიდან მე-80 წლის იუბილესთან დაკავშირებით, პარლამენტის თავმჯდომარე დავით უსუფაშვილი და საქართველოს პრემიერ-მინისტრი, ბიძინა ივანიშვილი სახელმწიფო კანცელარიაში დღეს კონსტანტინეპოლისა და ახალი რომის მთავარეპისკოპოსს, მსოფლიო პატრიარქს, ბართლომეოს პირველს და სრულიად საქართველოს კათოლიკოს-პატრიარქს ილია II–ს შეხვდა. 

„ჩემთვის დიდი პატივია ვიყო მონაწილე იმ უდიდესი ზეიმისა, რომელსაც ქართველი ხალხი აღნიშნავს. მისი უწმინდესობის ღვაწლის აღნიშვნა და დაფასება რამდენიმე დღის განმავლობაში შეუძლებელია. ამიტომ სახელმწიფო საიუბილეო კომისიას გადაწყვეტილი აქვს გააგრძელოს საიუბილეო დღეები, რომლის ფარგლებშიც ბევრი მნიშვნელოვანი ღონისძიება გაიმართება“, – განაცხადა პარლამენტის თავმჯდომარემ დავით უსუფაშვილმა. მისი თქმით, მზადდება რამდენიმე უნიკალური გამოცემა, რომლითაც კიდევ ერთხელ იქნება ხაზგასმული ჩვენი ქვეყნისთვის და მისი მომავლისთვის მართლმადიდებლური რელიგიის, ქრისტიანობის მნიშვნელობა.

„ვინაიდან თქვენ სტუმრად ბრძანდებით სახელმწიფო ხელისუფლების წარმომადგენლებთან, მინდა დაგარწმუნოთ, რომ არჩევნების შემდეგ, ჩვენი ქვეყნის მსახურების ძალიან მძიმე და საპატიო ტვირთი დაგვაწვა რათა ჩვენი სამშობლო ევროპული თანამეგობრობის ღირსეული წარმომადგენელი იყოს. მისი უწმინდესობა კი თავისი რჩევებით და ყოველდღიური დარიგებებით გვიადვილებს ყოველდღიური მძიმე საქმის კეთებას“, – აღნიშნა დავით უსუფაშვილმა. „ყველა თქვენგანის ერთად ჩამობრძანება საქართველოში უდიდესი მოვლენაა ამ ქვეყნის ყველა მოქალაქისთვის. ჩვენ ბედნიერი ვართ, რომ ბიზანტიური კულტურის საფუძველზე აღმოცენებულ ერებს შორის ერთ ისტორიულ, ქრისტიანულ, მართმადიდებლურ ოჯახში ვიმყოფრბით“, – მიმართა სტუმრებს პარლამენტის თავმჯდომარემ.
ხელისუფლების წარმომადგელებთან შეხვედრას სერბეთის, ბულგარეთის, ალექსანდრიის, კონსტანტინოპოლის, რუსეთის, ჩეხეთის მართლმადიდებელი ეკლესიების წინამძღოლები და მღვდელმთავრები ესწრებოდნენ.
სახელმწიფო კანცელარიაში შეხვედრამდე პარლამენტის თავმჯდომარე სასულიერო პირებთან ერთად წმ. ანდრია პირველწოდებულის სახელობის ქართულ უნივერსიტეტს ეწვია, სადაც სამეცნიერო კონფერენციის გახსნაში მიიღო მონაწილეობა. მან უწმინდესს საუბილეო თარიღები მიულოცა და მისასალმებელი სიტყვით მიმართა.
საპატიო სტუმრებს დავით უსუფაშვილი ხვალ უკვე საქართველოს პარლამენტში უმასპინძლებს.