პარლამენტის წევრები, აღმასრულებელი ხელისუფლების წარმომადგენლებთან, აფხაზეთის ავტონომიური რესპუბლიკის მთავრობის წევრებსა და აფხაზეთის უმაღლესი საბჭოს დეპუტატებთან ერთად, „აფხაზეთობის კვირეულის" ფარგლებში ზუგდიდში გამართულ ღონისძიებებს დაესწრნენ.

კვირეული, რომელიც აფხაზეთის კულტურისა და ტრადიციების წარმოჩენას ისახავს მიზნად, დადიანების სასახლის ეზოში მრავალფეროვანი შემეცნებით-კულტურული ღონისძიებებით გაიხსნა. ღონისძიებების დასასრულს გალაკონცერტი გაიმართა.

„აფხაზეთობის კვირეული“, საქართველოს კულტურის სამინისტროს მხარდაჭერითა და აფხაზეთის ავტონომიური რესპუბლიკის მთავრობის ორგანიზებით, 18-დან 24 მაისის ჩათვლით, საქართველოს სხვადასხვა ქალაქში აღინიშნება.

„აფხაზეთობის“ დღესასწაული 2014 წელს სრულიად საქართველოს კათოლიკოს-პატრიარქის, უწმინდესისა და უნეტარესის, ილია II-ის ლოცვა-კურთხევით დაწესდა და მას შემდეგ ყოველწლიურად აღინიშნება.