სპორტის კომიტეტის თავმჯდომარის პირველმა მოადგილემ, საქართველოს პარლამენტის კორეის რესპუბლიკის პარლამენტთან მეგობრობის ჯგუფის ხელმძღვანელმა შოთა ხაბარელმა კორეის რესპუბლიკის საქმეთა დროებით რწმუნებულ კიმ ტონგ ოპთან გამოსამშვიდობებელი შეხვედრა გამართა.

შეხვედრაზე კორეელი დიპლომატის საქართველოში საქმიანობის პერიოდი მიმოიხილეს და ყურადღება იმ პროექტებსა და პროგრამებზე გაამახვილეს, რომელიც ორი ქვეყნის ჩართულობით, ერთობლივად განხორციელდა.

შეხვედრაზე საუბარი ასევე შეეხო საქართველოსა და კორეას შორის არსებულ სავაჭრო-ეკონომიკურ ურთიერთობებს, საინვესტიციო პროექტებს, კულტურის სფეროში თანამშრომლობას და მხარდაჭერას ტურიზმის მიმართულებით.

შოთა ხაბარელის განცხადებით, საქართველოსა და კორეის პარლამენტებს შორის აქტიური თანამშრომლობის ფორმატი ჩამოყალიბდა, რასაც არაერთი ორმხრივი მაღალი დონის ვიზიტიც მოწმობს. მისივე თქმით, კორეის რესპუბლიკა ჩვენი ქვეყნის მეგობარი სახელმწიფოა, რომელიც მტკიცედ უჭერს მხარს საქართველოს სუვერენიტეტსა და ტერიტორიულ მთლიანობას.

კორეის რესპუბლიკის პარლამენტთან მეგობრობის ჯგუფის ხელმძღვანელმა კორეელ დიპლომატს საქართველოში მისიის შესრულებისთვის მადლობა გადაუხადა და სამომავლო საქმიანობაში წარმატებები უსურვა.