სპორტის კომიტეტის სხდომაზე ფინანსთა მინისტრის პირველმა მოადგილემ, გიორგი კაკაურიძემ საქართველოს 2025 წლის სახელმწიფო ბიუჯეტის შესრულების წლიური ანგარიში წარადგინა.

„2025 წლის ბოლოს სპორტის სამინისტროს სახელმწიფო ბიუჯეტიდან დამატებითი დაფინანსება გამოეყო. სამინისტრომ სწორი მენეჯმენტის შედეგად შეძლო და ბიუჯეტი 100.3%-ით აითვისა“, - განაცხადა ფინანსთა მინისტრის პირველმა მოადგილემ.

მომხსენებელმა 2025 წლის ძირითადი ფინანსური დოკუმენტის ეკონომიკურ, საშემოსავლო და საგადასახადო პარამეტრებზე დეტალურად ისაუბრა. მისი თქმით, 6%-ზე დაგეგმილი ეკონომიკური ზრდა ქვეყანამ 7.5%-ით დაასრულა. ბიუჯეტის დეფიციტი 2.5% იყო დაგეგმილი, წლის ბოლოს კი მხოლოდ 1.4% შეადგინა.

„საგარეო ბრუნვა 2024 წელთან შედარებით შარშან 10.3%-ით, ხოლო პირდაპირი ინვესტიციები - 7.6%-ით გაიზარდა. ზრდის ტენდენცია შენარჩუნდა ტურიზმიდან მიღებულ შემოსავლებში, რომელმაც 4 690.2 მილიონ დოლარს მიაღწია, რაც 6%-ით მეტია 2024 წლის მაჩვენებელზე. შარშან ფულადი გზავნილები წინა წელთან შედარებით 8.2%-ით გაიზარდა და 3 228.5 მილიონი დოლარი იყო“, - აღნიშნა გიორგი კაკაურიძემ.

მისივე თქმით, 2025 წელს სახელმწიფო ბიუჯეტის შემოსავლების ნაწილი 100.7%-ით შესრულდა და 23 816 მილიონი ლარი იყო, ხარჯვითმა ნაწილმა კი 22 854 მილიონი ლარი შეადგინა.

სპორტის კომიტეტის სხდომაზე საკითხის განხილვა კითხვა-პასუხის ფორმატში გაგრძელდა.

კომიტეტმა 2025 წლის სახელმწიფო ბიუჯეტის შესრულების წლიური ანგარიში დადებითად შეაფასა და ცნობად მიიღო.