ევროპასთან ინტეგრაციის კომიტეტის თავმჯდომარე თამარ ხულორდავა ევრონესტის საპარლამენტო ასამბლეის ბიუროს სხდომაში მიიღებს მონაწილეობას, რომელიც კიევში 30 ოქტომბერს გაიმართება.

2019 წლის საერთო ევროპული არჩევნებიდან ევროპარლამენტის მეცხრე მოწვევის ფარგლებში, ევრონესტის საპარლამენტო ასამბლეის პირველი ბიურო გაიმართება, სადაც აღმოსავლეთ პარტნიორობის ათი წლის იუბილესთან დაკავშირებით 2019 წელს განხორციელებულ აქტივობებზე, აღმოსავლეთ პარტნიორობის ფარგლებში ევრონესტის საპარლამენტო ასამბლეის სამომავლო გეგმებზე და ევრონესტის საპარლამენტო ასამბლეის მერვე პლენარული სხდომის გეგმებზე იმსჯელებენ, რომელიც მიმდინარე წელს საქართველოში გაიმართება. 

ყოველწლიურად ასამბლეა ევროპარლამენტის და აღმოსავლეთ პარტნიორი პარლამენტების წარმომადგენლების თანაავტორობით შეიმუშავებს რეზოლუციებს.

2019 წელს საქართველოს დელეგაციის მიერ მომზადდება ანგარიში თემაზე: „სოლიდარობა და დაახლოება ენერგეტიკის სექტორში - რეგულირებისაკენ“.

ევრონესტის საპარლამენტო ასამბლეა არის აღმოსავლეთ პარტნიორობის პოლიტიკის საპარლამენტო ინსტიტუტი, რომელიც შედგება ევროპარლამენტისა (60 წევრი) და აღმოსავლეთ ევროპული ქვეყნების საპარლამენტო დელეგაციებისგან (10 წევრი თითოეული ეროვნული პარლამენტიდან: აზერბაიჯანი, სომხეთი, საქართველო, მოლდოვა, უკრაინა. ბელორუსის მონაწილეობა დროებით შეჩერებულია პოლიტიკური მიზეზების გამო).

საქართველოს პარლამენტის დელეგაციაში 10 ძირითადი და 5 სათადარიგო წევრია. ეს ფორუმი საპარლამენტო კონსულტაციების და ევროინტეგრაციულ პროცესებზე ზედამხედველობის გზით, ხელს უწყობს ევროკავშირსა და აღმოსავლეთ ევროპულ ქვეყნებს შორის პოლიტიკურ ასოცირებას და ეკონომიკურ ინტეგრაციას