ჯანმრთელობის დაცვისა და სოციალურ საკითხთა კომიტეტის თავმჯდომარემ, აკაკი ზოიძემ საქართველოში გაეროს ბავშვთა ფონდის (UNICEF) ახლადდანიშნულ წარმომადგენელთან, ღასან ხალილთან გაცნობითი ხასიათის შეხვედრა გამართა.

აკაკი ზოიძემ შეხვედრაზე გაეროს ბავშვთა ფონდის საქმიანობის მნიშვნელობა აღნიშნა და საქართველოში განხორციელებული პროექტების მიმართ მადლიერება გამოთქვა.

„გაეროს ბავშვთა ფონდის წარმომადგენლობა ჯანმრთელობის დაცვის, სოციალურ და განათლების საკითხებზე რამდენიმე პროექტს ახორციელებს და ამ მიმართულებით მთავრობას უჭერს მხარს. ფონდმა მნიშვნელოვანი ტექნიკური დახმარება გასწია ბავშვთა სიღარიბის დაძლევის მიმართ და ეროვნული მასშტაბით, პირველად იწყებს მულტიინდიკატორულ კვლევას, რომელიც ბავშვების სისხლში ტყვიის შემცველობის განსაზღვრას შეეხება, რაც დედათა და ბავშვთა სიკვდილიანობის საკითხების და უშუალოდ ბავშვთა მდგომარეობის პრობლემატური საკითხების შესწავლაში დაგვეხმარება“, - განაცხადა აკაკი ზოიძემ.

შეხვედრაზე მხარეებმა კომიტეტსა და ფონდს შორის არსებული ურთიერთობები მიმოიხილეს და სამომავლო თანამშრომლობის ასპექტები განსაზღვრეს.