ფრაქცია „ქართული ოცნება-ძლიერი საქართველოსთვის“ თავმჯდომარე, ბიძინა გეგიძე პარლამენტის სტაჟიორებს შეხვდა.

შეხვედრაზე ფრაქციის თავმჯდომარემ ახალგაზრდებს ფრაქციის მიზნები და ამოცანები გააცნო. მისი თქმით, ფრაქცია რამდენიმე თვის წინ ჩამოყალიბდა და ძალიან აქტიურად არის ჩართული საპარლამენტო მუშაობაში.

„ჩვენი მიზანია ძლიერი და ერთიანი ქართული სახელმწიფოს შექმნა, სადაც პირველ რიგში თითოეული მოქალაქის ინტერესი იქნება დაცული. ადამიანის უფლებების დაცვა ჩვენი ფრაქციისთვის უმნიშვნელოვანესია. ფრაქცია უპირველეს ამოცანად მიიჩნევს საპარლამენტო კონტროლისა და საპარლამენტო ზედამხედველობის განხორციელებას. ჩვენი ფრაქცია ღიაა ყველა მოქალაქისთვის. არ ვერიდებით მწვავე დებატებსა და დისკუსიებს. გვსურს, რომ ჩვენი წვლილი შევიტანოთ ძლიერი სახელმწიფოს შენებაში“, - განაცხადა ფრაქციის თავმჯდომარემ.

ბიძინა გეგიძე ასევე შეეხო ტერიტორიული მთლიანობის საკითხს. მისი თქმით, გონივრული პოლიტიკის გატარებით, ქვეყანა შეძლებს ამ პრობლემის მოგვარებას.

„ჩვენ უნდა დავანახოთ აფხაზ და ოს ძმებს, მთელი რიგი სიკეთეები, რისი მიცემაც საქართველოს შეუძლია. უნდა დავათბოთ ურთიერთობები, აღვადგინოთ კავშირები. მართალია ნელ-ნელა, მაგრამ წინ გადადგმული ნაბიჯები უკვე სახეზე გვაქვს. ჩვენ ერთი მთლიანი ნაწილი ვართ“, - აღნიშნა ბიძინა გეგიძემ.

ფრაქციის თავმჯდომარე ახალგაზრდებს ქალაქის გეგმარების პრობლემაზეც ესაუბრა.

„განსაკუთრებით პრობლემურია ეკოლოგიის საკითხი. უნებართვო მშენებლობები, კულტურული მემკვიდრეობის ძეგლების დაცვა. ეს არ გახლავთ მარტივი საკითხი და ამ პრობლემის მოსაგვარებლად საკმაოდ რთული გზის გავლა მოგვიწევს“, - განაცხადა ბიძინა გეგიძემ.

ფრაქციის თავმჯდომარემ სტაჟიორებს გააცნო ფრაქციის ახალი ინიციატივა, რომელიც სტაჟირების გავლის სამართლებრივ რეგულაციებს ეხება და სტაჟიორების სტატუსის განსაზღვრას, სტაჟირების დამადასტურებელი დოკუმენტის გაცემას და სტაჟირების შრომით სტაჟში ჩათვლას ითვალისწინებს.

შეხვედრა დისკუსიის რეჟიმში წარიმართა, სადაც ახალგაზრდებმა არაერთ საინტერესო შეკითხვაზე მიიღეს ამომწურავი ინფორმაცია.

ფრაქციის თავმჯდომარემ წარმატებები უსურვა ახალგაზრდებს და აღნიშნა, რომ ფრაქცია მზადაა მათთან აქტიური კომუნიკაციისთვის.