ფრაქცია „ნაციონალური მოძრაობის“ თავმჯდომარე, რომან გოცირიძე, ევროკავშირის წარმომადგენლობის ხელმძღვანელს, იანოშ ჰერმანს შეხვდა.

ფრაქციის თავმჯდომარე ევროკავშირის ელჩს ფრაქციის საქმიანობაზე ესაუბრა და სამომავლო გეგმები გააცნო. „შეხვედრაზე ვისაუბრეთ ფრაქცია „ნაციონალური მოძრაობის“ როლზე პარლამენტში, თუ რის გაკეთებას ვაპირებთ, როგორია ჩვენი გეგმები და როგორი იქნება ჩვენი თანამშრომლობა ევროკავშირის ქვეყნებთან“, - განაცხადა შეხვედრის დასრულების შემდეგ რომან გოცირიძემ.

მისივე თქმით, შეხვედრაზე საუბარი შეეხო სამაუწყებლო კომპანია „რუსთავი 2"-სა და საზოგადოებრივ მაუწყებელთან დაკავშირებით განვითარებულ მოვლენებს.

რომან გოცირიძემ ელჩს პარტია „ნაციონალური მოძრაობის“ სამომავლო გეგმებიც გააცნო. „შეხვედრაზე განვიხილეთ მრავალი, მათ შორის, პარტია „ნაციონალური მოძრაობის“, როგორც მომავალი მთავარი ოპოზიციური პარტიის საკითხი, თუ რას ვაპირებთ მომავალ საპარლამენტო არჩევნებში, როგორი იქნება ჩვენი ურთიერთობები ევროსტრუქტურებთან. ასევე, ვისაუბრეთ ყველა იმ პრობლემურ საკითხზე, რომელიც დღეს არის საქართველოში“, - განაცხადა რომან გოცირიძემ.

ევროკავშირის წარმომადგენლობის ხელმძღვანელთან გამართულ შეხვედრას ფრაქცია „ნაციონალური მოძრაობის“ მდივანი, თინათინ ბოკუჩავაც ესწრებოდა.