დარგობრივი ეკონომიკისა და ეკონომიკური პოლიტიკის კომიტეტის თავმჯდომარე დავით სონღულაშვილი მადრიდში, ევროკავშირის ეროვნული პარლამენტების ევროპულ საქმეთა კომიტეტების კონფერენციის პლენარულ სესიაზე სიტყვით გამოვიდა.

დავით სონღულაშვილმა საქართველოს ენერგეტიკულ პოტენციალზე და ამ მიმართულებით განსახორციელებელ პროექტებზე ისაუბრა.

„საქართველოში ენერგეტიკული პროექტების განხორციელებისთვის ხელსაყრელი გარემო პირობები და დიდი პოტენციალია. ამ პოტენციალს, გეოგრაფიულ უპირატესობასთან ერთად, შეუძლია მნიშვნელოვანი როლი ითამაშოს ევროპის ენერგო უსაფრთხოების გაფართოებაში. ერთ-ერთი მნიშვნელოვანი შავი ზღვის წყალქვეშა ელექტრო კაბელის პროექტის განხორციელებაა, რომელიც საქართველოს ევროპასთან დააკავშირებს. ეს, რა თქმა უნდა, ელექტროენერგიის განახლებადი წყაროებიდან ევროკავშირის ბაზარზე წვდომას უზრუნველყოფს, რაც ენერგო სექტორში არსებული გამოწვევების გადაჭრასა და კრიზისის დაძლევაში დაგვეხმარება. პარალელურად, ქვეყანაში ვმუშაობთ ენერგოდამოუკიდებლობის აქტზე, რომელიც საკანონმდებლო ჩარჩოში მოექცევა და ხელს შეუწყობს მწვანე ენერგიის გენერაციის გაზრდას და საქართველოში ენერგეტიკული პროექტების განხორციელებას“, - განაცხადა კომიტეტის თავმჯდომარემ.

მან თავის გამოსვლაში ხაზი გაუსვა საქართველოსთვის კანდიდატის სტატუსის მინიჭების შესახებ ევროპული საბჭოს მხრიდან პოზიტიური გადაწყვეტილების მოლოდინს.

„ევროკავშირთან და მის წევრ ქვეყნებთან ენერგო სექტორში ურთიერთობის გაღრმავება განსაკუთრებით მნიშვნელოვანია ახლა, როცა ჩვენი ქვეყანა ელოდება ევროპული საბჭოს გადაწყვეტილებას ევროკავშირის წევრობის კანდიდატის სტატუსის მიღებასთან დაკავშირებით, რაც დარწმუნებული ვარ, დადებითად გადაწყდება. ეს საქართველოს მისცემს საშუალებას თავისი წვლილი შეიტანოს ევროპის ენერგო უსაფრთხოებაში“, - აღნიშნა დავით სონღულაშვილმა.

საქართველოს საპარლამენტო დელეგაცია ევროკავშირის წევრი ქვეყნების ევროპულ საქმეთა კომიტეტების შეხვედრებში ესპანეთის პარლამენტის მოწვევით მონაწილეობს.

​კონფერენციაში მონაწილეობენ ევროკავშირის 27 წევრი სახელმწიფოს და კანდიდატი ქვეყნების პარლამენტების წარმომადგენლები.