„გაუზიარე წარმატება და შექმენი წარმატების საკუთარი ფორმულა,“ - თბილისის საგანმანათლებო დაწესებულებაში ახალი პროექტი „საავტორო საათი“ იწყება.

პროექტის პრეზენტაციაზე, რომელიც თბილისის საკრებულოში გაიმართა, განათლების, მეცნიერებისა და კულტურის კომიტეტის თავმჯდომარე გენადი მარგველაშვილი სიტყვით გამოვიდა.

პროექტის ფარგლებში თბილისის საგანმანათლებლო სკოლებში მოეწყობა შეხვედრები მოსწავლეებსა და შემოქმედებითი სფეროს წარმომადგენლებთან, რომლებიც ისაუბრებენ პირად წარმატებასა და გამოცდილებაზე, საქართველოში საავტორო უფლების დაცვასა და ავტორთა უფლების სამართლებრივ მნიშვნელობაზე. ჩატარდება მასტერკლასები და დისკუსიები კონკრეტული შემთხვევების, ისტორიებისა და გამოცდილების შეფასება-ანალიზის მიზნით.

გენადი მარგველაშვილი: „აუცილებელია ახალი სკოლის მოდელის ქვეშ იმ ტიპის აქტივობების, იმ ტიპის ეროვნული სასწავლო გეგმის დანერგვა, რომელიც ბავშვს კრეატივისკენ უბიძგებს. ახალი სკოლის მოდელი პილოტირებით ორ სკოლაში - 150–ე და 165–ე სკოლაში განხორციელდა. თუმცა, ჩვენ 2083 სკოლა გვაქვს და მნიშვნელოვანია, რომ ახალი სკოლის მოდელი გავიტანოთ ყველგან. შესაბამისად, ამისთვის აუცილებელია ადამიანური რესურსი ანუ ის ადამიანები, რომლებიც მოცემული ნიჭების მიხედვით არიან უმაღლესი დონის პროფესიონალები. პარლამენტმა მიიღო კანონი, რომლის იმპლემენტაციაც უნდა მოხდეს. ამ კანონის თანახმად, სკოლის დირექტორს შეუძლია მოწვეული მასწავლებლის სკოლაში მოყვანა, რომელიც არ იქნება სქემაში ჩართული. მნიშვნელოვანია, ასევე სპორტის, ხელოვნების, სტემის, ტექნოლოგიური მიმართულებებით და მართვის კუთხით ნიჭების აღმოჩენა ადრეული ასაკიდანვე. მიგვაჩნია, რომ 4–6 კლასში მოსწავლეებს უნდა ჰქონდეთ არა გამოცდა, არამედ განმავითარებელი შეფასება, რომელიც ხელს შეუწყობს ნიჭების აღმოჩენას, შემდეგ, ამ ნიჭების გაღვივებას და რეალიზებას ყველა მიმართულებით. რა თქმა უნდა, ამ პროცესში პედაგოგის როლი უაღრესად მნიშვნელოვანია“.