განათლების, მეცნიერებისა და ახალგაზრდულ საქმეთა კომიტეტის თავმჯდომარის პირველმა მოადგილემ გიორგი ჩაკვეტაძემ ქართული ენის სასკოლო კონკურსში გამარჯვებული მოსწავლეებისა და დიასპორის პროგრამაში ჩართული ქართული ენის დისტანციური სწავლების მიმართულების მასწავლებლების დაჯილდოებაში მიიღო მონაწილეობა.

ღონისძიება განათლების, მეცნიერებისა და ახალგაზრდობის მინისტრმა გივი მიქანაძემ გახსნა და დამსწრე საზოგადოებას სიტყვით მიმართა.

ქართული ენის კონკურსში საჯარო და კერძო სკოლების საბაზო და საშუალო საფეხურის მოსწავლეები მონაწილეობდნენ. კონკურსის ფარგლებში მოსწავლეებმა სხვადასხვა შემოქმედებითი ხასიათის პროექტი შექმნეს. 

დიასპორის პროგრამა მასწავლებელთა პროფესიული განვითარების ეროვნული ცენტრის მიერ ხორციელდება. 2025 წელს პროგრამის ფარგლებში შეიქმნა ახალი საგანმანათლებლო ელექტრონული პლატფორმა ,,ქართული ენა ემიგრანტებისთვის’’ რომელიც 82 ქვეყანაში მცხოვრებ 3080-მდე მოსწავლეს აძლევს შესაძლებლობას დისტანციურად ჩაერთოს სასწავლო პროცესში.

ამავე პროგრამის ფარგლებში ხორციელდება ღირებულებითი განათლების კლუბების კომპონენტი, რომელსაც საქართველოს საპატრიარქოს ხელშეწყობით სასულიერო პირები უძღვებიან.

ქართული ენის კონკურსში გამარჯვებულ მოსწავლეებსა და დიასპორის პროგრამაში ჩართულ მასწავლებლებს შესაბამისი სერტიფიკატები და საჩუქრები გადაეცათ. 

ღონისძიებას საკანონმდებლო და აღმასრულებელი ხელისუფლებისა და საპატრიარქოს წარმომადგენლები ესწრებოდნენ.