ევროპასთან ინტეგრაციის კომიტეტის თავმჯომარე მაკა ბოჭორიშვილი ავსტრიის პარლამენტის საგარეო ურთიერთობათა კომიტეტის თავმჯდომარეს და კომიტეტის წევრებს შეხვდა.

მხარებმა იმსჯელეს ორ ქვეყანას შორის არსებული მრავალწლიანი ურთიერთობების დინამიკაზე და თანამშრომლობის გაღრმავების მნიშვნელობაზე. საუბარი შეეხო საქართველოს საგარეო პოლიტიკურ პრიორიტეტებს, ევროპულ და ევროატლანტიკურ სტრუქტურებში საქართველოს ინტეგრაციის მნიშვნელოვან საკითხებს, რეგიონში არსებულ გეოპოლიტიკურ ვითარებას და უსაფრთხოების გამოწვევებს საქართველოში და რეგიონში.

მაკა ბოჭორიშვილმა ყურადღება გაამახვილა საქართველოს ევროკავშირში გაწევრიანების დღის წესრიგსა და ევროკომისიის რეკომენდაციების შესრულების პროცესზე.

ავსტრიულმა მხარემ მხარდაჭერა გამოთქვა ევროკავშირის გაფართოების პოლიტიკისადმი და ყურადღება გაამახვილა გაფართოებისთვის საჭირო რეფორმებზე, თანმდევ გამოწვევებსა და შიდა პოლიტიკურ პერსპექტივებზე.