პარლამენტის განათლების, მეცნიერებისა და ახალგაზრდულ საქმეთა კომიტეტის თავმჯდომარე მარიამ ლაშხი ვლადიმირ კომაროვის თბილისის ფიზიკა-მათემატიკის 199-ე საჯარო სკოლის 60 წლის იუბილესადმი მიძღვნილ ღონისძიებაზე სიტყვით გამოვიდა.

მარიამ ლაშხმა სკოლის მოსწავლეებს, მასწავლებლებს და ადმინისტრაციის წარმომადგენლებს საიუბილეო თარიღი მიულოცა და კომაროვის სკოლის განსაკუთრებულ როლზე ისაუბრა.

„დღევანდელი დღე აერთიანებს წარსულს, აწმყოსა და მომავალს და გვახსენებს, რომ განათლება პროგრესისა და განვითარების მთავარი საფუძველია. საქართველოს კონსტიტუციისა და შესაბამისი კანონმდებლობის საფუძველზე დამტკიცებული ზოგადი განათლების ეროვნული გეგმა განსაზღვრავს იმ ძირითად ღირებულებებსა და პრინციპებს, რომლებზეც უნდა იყოს აგებული საგანმანათლებლო სისტემა. ის გულისხმობს ისეთი გარემოს შექმნას, რომელიც დაფუძნებულია ეროვნულ და დემოკრატიულ ღირებულებებზე, პიროვნულ და სოციალურ განვითარებაზე, ინკლუზიასა და სამოქალაქო პასუხისმგებლობაზე. სწორედ ასეთი გარემოა ვლადიმირ კომაროვის თბილისის ფიზიკა-მათემატიკის 199-ე საჯარო სკოლაში. ჩვენი დიდი პატივისცემა იმ ადამიანებს, რომლებიც ქმნიან მომავალ თაობას“, - განაცხადა მარიამ ლაშხმა.

საიუბილეო ღონისძიებაზე კომაროვის სკოლის დირექტორმა ვახტანგ ჯაოშვილმა მოწვეულ სტუმრებს სკოლის განვითარების ისტორია გააცნო.

ღონისძიების ფარგლებში, კომაროვის სკოლის პედაგოგებს მრავალწლიანი შრომისთვის და სკოლის განვითარებაში შეტანილი განსაკუთრებული წვლილისთვის ჯილდოები გადაეცათ.

საიუბილეო ღონისძიებაში მონაწილეობდნენ: განათლების, მეცნიერებისა და ახალგაზრდობის მინისტრი გივი მიქანაძე, ინფრასტრუქტურის მინისტრი რევაზ სოხაძე და ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის მინისტრი მიხეილ სარჯველაძე.