საქართველოს პარლამენტის ადამიანის უფლებათა დაცვისა და სამოქალაქო ინტეგრაციის კომიტეტის თავმჯდომარემ რატი იონათამიშვილმა და ქალთა და ბავშვთა საკითხებზე მომუშავე პარლამენტის დროებითი კომისიის მდივანმა ეკა სეფაშვილმა, 11–12 თებერვალს, ჟენევაში, გაერო-ს ეკონომიკური, სოციალური და კულტურული უფლებების კომიტეტის (CESCR) 79-ე სესიის მე-7 შეხვედრაში მიიღეს მონაწილეობა.

სესიის განმავლობაში პარლამენტის წარმომადგენლებმა კომიტეტის წევრებს გააცნეს ბოლო ხუთი წლის განმავლობაში ადამიანის უფლებათა დაცვის მიმართულებით განხორციელებული საკანონმდებლო ცვლილებები და ხაზი გაუსვეს, რომ საქართველო კიდევ ერთხელ ადასტურებს ადამიანის უფლებებისადმი მტკიცე ერთგულებას, რომელიც ეფუძნება კონსტიტუციურ გარანტიებს.

განსაკუთრებული ყურადღება დაეთმო გამჭვირვალობის, ოჯახური ღირებულებებისა და არასრულწლოვანთა დაცვის საკანონმდებლო ჩარჩოს მნიშვნელობას.

პარლამენტის წევრების განცხადებით, საქართველოსთვის ბავშვთა უფლებები პრიორიტეტია, ხოლო დისკრიმინაციის წინააღმდეგ ეროვნული კანონი იცავს ყველა ადამიანის უფლებას და თანასწორობას.

მიღებული პროგრესი მოიცავს კარგი მმართველობის, საკუთრების უფლების დაცვის, ეკონომიკური სტაბილურობის, სასამართლო დამოუკიდებლობის, მედია პლურალიზმის, ქალთა, ბავშვთა და შეზღუდული შესაძლებლობის მქონე პირთა უფლებებისა და ინკლუზიური პოლიტიკური წარმომადგენლობის მიმართულებებს, რაც ასახულია წამყვან საერთაშორისო ინდექსებსა და ადამიანის უფლებათა ევროპული სასამართლოს პრეცედენტულ სამართალში.

საქართველოს პარლამენტის წევრებმა ხაზი გაუსვეს საერთაშორისო ხელშეკრულებების ფარგლებში გამართული ღონისძიებების მნიშვნელობას და აღნიშნეს, რომ ადამიანის უფლებების დაცვის სფეროში საერთაშორისო მექანიზმებთან აქტიური თანამშრომლობა ქვეყნის ერთ-ერთ მნიშვნელოვან პრიორიტეტად რჩება.