საპარლამენტო პოლიტიკურმა ჯგუფმა „რეფორმების ჯგუფი“ პარლამენტში 1991 წლის 31 მარტის რეფერენდუმისადმი მიძღვნილი ღონისძიება გამართა, სადაც სახელმწიფოებრივი დამოუკიდებლობის აღდგენის აქტზე ხელის მომწერ უზენაეს საბჭოს წევრებს უმასპინძლა.

„რეფორმების ჯგუფის“ წევრის, გიორგი ვაშაძის განცხადებით, ეს დღე მნიშვნელოვანია ჩვენი ქვეყნისთვის, რადგან ამ დღეზე დგას საქართველოს დამოუკიდებლობის და თავისუფლების ფუნდამენტი.

„გილოცავთ დღევანდელ დღეს 31 მარტს, 31 წლის წინ საქართველოს მოსახლეობის 98.9%-მა მხარი დაუჭირა საქართველოს დამოუკიდებლობის აღდგენას. ვფიქრობ, რომ ძალიან მნიშვნელოვანია ეს დღე ყველამ აღვნიშნოთ, რადგან ამაზე დგას საქართველოს დამოუკიდებლობის და თავისუფლების ფუნდამენტი. ჩვენ დღეს ვმასპინძლობთ იმ ადამიანებს, რომლებმაც ხელი მოაწერეს დამოუკიდებლობის აღდგენის აქტს, ეს არის ის სიმბოლური დაფასება, რომელიც შეიძლება გავაკეთოთ ამ ადამიანებთან მიმართებაში. გამოვდივართ ინიციატივით, რომ დაფასებული იყოს მათი ღვაწლი კონკრეტული ინიციატივებით პარლამენტში. როდესაც ვსაუბრობთ ეროვნულ თანხმობაზე, სწორედ მსგავს დღეს, მსგავს საკითხებში ერთიანობას და თანხმობას აქვს გადამწყვეტი მნიშვნელობა, რომ ავაშენოთ ძლიერი სახელმწიფო“, - განაცხადა გიორგი ვაშაძემ.

1991 წლის 31 მარტს საქართველოში გამართულ საყოველთაო სახალხო რეფერენდუმზე, სახელმწიფოებრივი დამოუკიდებლობის აღდგენას მხარი საარჩევნო ხმის უფლების მქონე მოსახლეობის 98.9%-მა დაუჭირა.