საქართველოს პარლამენტი პრემიერ-მინისტრის ყოველწლიურ მოხსენებას სამთავრობო პროგრამის შესრულების მიმდინარეობის შესახებ ივნისის ბოლო კვირაში მოისმენს. პარლამენტის თავმჯდომარის შალვა პაპუაშვილის განცხადებით, ზუსტი თარიღი მოგვიანებით, ბიუროს სხდომაზე დადგინდება.

პარლამენტის ბიუროს გადაწყვეტილებით, კომიტეტებში რამდენიმე ახალი კანონპროექტის განხილვის პროცედურები დაიწყება. კერძოდ, იურიდიულ საკითხთა კომიტეტი განიხილავს კანონპროექტს „საპარლამენტო მდივნის შესახებ“ საქართველოს კანონში ცვლილების შეტანის თაობაზე“. პროექტი საქართველოს მთავრობის საპარლამენტო მდივნის მოადგილის თანამდებობის გაუქმებას ითვალისწინებს.

ბიურომ კანონპროექტზე - „სააღსრულებო წარმოებათა შესახებ“ საქართველოს კანონში ცვლილების შეტანის თაობაზე“ წამყვან კომიტეტად ადამიანის უფლებათა დაცვისა და სამოქალაქო ინტეგრაციის კომიტეტი განსაზღვრა. კანონპროექტის თანახმად, ყადაღას არ დაექვემდებარება და შედეგად, აღსასრულებლად არ მიექცევა ორსულობისა და მშობიარობის გამო ანაზღაურებადი შვებულებისა და ბავშვის მოვლის გამო ანაზღაურებადი შვებულების პერიოდზე საქართველოს სახელმწიფო ბიუჯეტიდან გასაცემი ფულადი დახმარება, საქართველოს მთავრობის მიერ განსაზღვრული ოდენობით.