სოფიო ქაცარავა: „გაეროს გენერალური ასამბლეა ის უმაღლესი პლატფორმაა, სადაც გვეძლევა შესაძლებლობა მსოფლიო ლიდერების წინაშე საქართველოსთვის მნიშვნელოვანი საკითხები გავახმოვანოთ\"
საგარეო ურთიერთობათა კომიტეტის თავმჯდომარე, სოფიო ქაცარავასაქართველოს დელეგაციასთან ერთად ოფიციალური ვიზიტით აშშ-ში იმყოფება, სადაც გაეროს გენერალური ასამბლეის 74-ე სესია მიმდინარეობს.
საქართველოს დელეგაციას პრეზიდენტი სალომე ზურაბიშვილი ხელმძღვანელობს.
ვიზიტის ფარგლებში, შეხვედრები გაიმართა ევროპული საბჭოს პრეზიდენტ დონალდ ტუსკთან და გაეროს გენერალურ მდივან ანტონიო გუტიერეშთან, ასევე ფინეთის, რუმინეთის, ლატვიის, გვატემალას, ყაზახეთის, ერაყის პრეზიდენტებთან; ნორვეგიის და ბარბადოსის პრემიერმინისტრებთან.
შეხვედრების მთავარი თემა იყო საქართველოს ოკუპირებულ ტერიტორიებზე არსებული მძიმე ვითარება და დეოკუპაციის საკითხი.
მხარეებმა განიხილეს ქვეყნებს შორის არსებული ორმხრივი ურთიერთობები; ევროკავშირსა და ნატოში ინტეგრაციის გზაზე, საქართველოს მიერ განხორციელებული და მიმდინარე რეფორმები.
„გაეროს გენერალური ასამბლეა ის უმაღლესი პლატფორმაა, სადაც გვეძლევა შესაძლებლობა მსოფლიო ლიდერების წინაშე საქართველოსთვის მნიშვნელოვანი საკითხები გავახმოვანოთ და ორმხრივ ფორმატებში სახელმწიფოს ლიდერებთან განვიხილოთ ჩვენთვის პრიორიტეტული მიმართულებები,” - განაცხადა სოფიო ქაცარავამ.
დელეგაციის შემადგენლობაში შედიან: საქართველოს საგარეო საქმეთა მინისტრი, ოკუპირებულ ტერიტორიებიდან დევნილთა, შრომისა, ჯანმრთელობისა და სოციალური დაცვის მინისტრი, საქართველოს პარლამენტის საგარეო ურთიერთობათა და განათლების, მეცნიერების და კულტურის კომიტეტების თავმჯდომარეები.
