სპორტის და დიასპორის კომიტეტების ერთობლივ სხდომაზე, ფინანსთა მინისტრის პირველმა მოადგილემ გიორგი კაკაურიძემ საქართველოს 2026 წლის სახელმწიფო ბიუჯეტის პირველი კვარტლის შესრულებასთან დაკავშირებით ინფორმაცია წარადგინა.

მომხსენებელმა სახელმწიფო ბიუჯეტის ეკონომიკურ პარამეტრებზე, საგარეო ვაჭრობიდან და ტურიზმიდან მიღებულ შემოსავლებსა და საბიუჯეტო ხარჯებზე ისაუბრა.

2026 წლის მარტში წინა წლის შესაბამის პერიოდთან შედარებით რეალური მთლიანი შიდა პროდუქტის ზრდამ 10.7 პროცენტი, ხოლო პირველი კვარტალის საშუალო რეალურმა ზრდამ 9.1 პროცენტი შეადგინა.


მისივე განცხადებით, 2026 წლის პირველ კვარტალში საგარეო სავაჭრო ბრუნვამ 5 867 მილიონი დოლარი შეადგინა, საიდანაც 1 723 მილიონი დოლარი ექსპორტის მაჩვენებელია.

ფინანსთა მინისტრის პირველმა მოადგილემ ტურიზმიდან მიღებულ შემოსავლებზეც ისაუბრა.

მისი თქმით, მიუხედავ იმისა, რომ ახლო აღმოსავლეთში მიმდინარე კონფლიქტის გამო გარკვეული ქვეყნებიდან საქართველოში ტურისტების შემოსვლამ იკლო, პირველ კვარტალში საქართველომ მილიონამდე ვიზიტორი მიიღო, ტურიზმიდან შემოსავალი კი 829 მლნ დოლარს შეადგენს.

გიორგი კაკაურიძემ ნაერთი ბიუჯეტის და სახელმწიფო ბიუჯეტის საშემოსავლო და ხარჯვითი ნაწილის მონაცემებიც წარადგინა. მინისტრის პირველმა მოადგილემ სახელმწიფო უწყებების მიერ ბიუჯეტის ათვისების მაჩვენებლებზე ისაუბრა და აღნიშნა, რომ საანგარიშო პერიოდში საგარეო საქმეთა სამინისტრომ გამოყოფილი დაფინანსების 91.2%, ხოლო სპორტის სამინისტრომ - 76% აითვისა.


მისივე განმარტებით, სპორტის სამინისტროს მიერ თანხის ათვისების დაბალი მაჩვენებელი საქართველოში გასამართ სხვადასხვა საერთაშორისო ტურნირს უკავშირდება, რომელიც წლის განმავლობაში ჩატარდება და შესაბამისად, საბიუჯეტო წლის დასრულებამდე სპორტის უწყება გამოყოფილ ასიგნებებს სრულად აითვისებს.

კომიტეტების ერთობლივ სხდომაზე საქართველოს 2026 წლის სახელმწიფო ბიუჯეტის შესრულების 3 თვის მიმოხილვა ცნობად მიიღეს.