სპორტის კომიტეტის სხდომაზე შინაგან საქმეთა მინისტრის მოადგილემ ალექსანდრე დარახველიძემ პირველი მოსმენით, „იარაღის შესახებ" საქართველოს კანონში ცვლილების შეტანის თაობაზე“ კანონპროექტი და მისი თანამდევი კანონპროექტთა პაკეტი წარადგინა. მომხსენებელმა კომიტეტის წევრებს იარაღის იმ სახეობების შესახებ მიაწოდა ინფორმაცია, რომელთა შეძენაზე, შენახვაზე, ტარებასა და გამოყენებაზე რეგულაციების გამკაცრება იგეგმება. საუბარია ელექტროშოკურ მოწყობილობებზე, გაზის აეროზოლსა (ე.წ. წიწაკის სპრეი) და ხმოვან (აკუსტიკურ) იარაღზე.

მინისტრის მოადგილის განცხადებით, იარაღის ამ სამ კატეგორიაზე ამჟამად ბუნდოვანი საკანონმდებლო ჩანაწერია და შესაბამისი რეგულაციები არ არსებობს. მისივე თქმით, აღნიშნული პრობლემის მოგვარების მიზნით, სამინისტრომ ევროპული ქვეყნების გამოცდილების საფუძველზე კანონპროექტთა პაკეტი მოამზადა, რომლის მიხედვითაც ელექტროშოკური მოწყობილობების სამოქალაქო ბრუნვიდან ამოღება იგეგმება და მათი გამოყენება მხოლოდ ადმინისტრაციულ ორგანოებს შეეძლება. რაც შეეხება გაზის აეროზოლსა და ხმოვან იარაღს, ფიზიკურ და იურიდიულ პირებს პოლიციის წინასწარი თანხმობის შემდეგ, კონკრეტული დასაბუთების საფუძველზე, აღნიშნული იარაღის შეძენის საშუალება მიეცემათ.

კომიტეტის თავმჯდომარის ვიქტორ სანიკიძის შეფასებით, კანონპროექტის თანახმად, უსაფრთხოების მოთხოვნებთან შესაბამისობაში მოყვანის მიზნით, მნიშვნელოვანი ცვლილებები იგეგმება, რასაც კომიტეტი მხარს უჭერს.