სპორტის კომიტეტის მიერ შექმნილმა სპორტისა და ფიზიკური აღზრდის სფეროს განვითარების ხელშემწყობი სამუშაო ჯგუფის წევრებმა - შოთა ხაბარელმა და ვლადიმერ ბოჟაძემ აღმასრულებელი ხელისუფლების წარმომადგენლებთან შეხვედრა გამართეს.

შეხვედრაზე საქართველოს მუნიციპალიტეტებში არსებულ სპორტულ სექციებში დასაქმებული მწვრთნელების ანაზღაურებისა და სასკოლო სპორტული ინფრასტრუქტურის გაუმჯობესების საკითხებზე იმსჯელეს. შეხვედრის მონაწილეებმა განხილულ თემებზე საკუთარი მოსაზრებები წარმოადგინეს და იმ საჭიროებებზე ისაუბრეს, რომლებიც რეგიონებში სპორტის განვითარებასა და ხელშეწყობას უკავშირდება.

„სპორტისა და ფიზიკური აღზრდის სფეროს განვითარების ხელშემწყობი სამუშაო ჯგუფი პრობლემურ საკითხებზე მუშაობს. ერთ-ერთ გამოწვევას მწვრთნელების ანაზღაურების საკითხი წარმოადგენს. რეგიონებში მწვრთნელები მინიმალური ხელფასის პირობებში მუშაობენ. გვინდა, მათი ხელფასის მატების საკითხი წამოვწიოთ წინ. ეს განსაკუთრებით მნიშვნელოვანია იმ მხრივაც, რომ ქვეყნის მასტშაბით, სხვადასხვა მუნიციპალიტეტში მულტიფუნქციური სპორტული ინფრასტრუქტურის და ობიექტების მშენებლობა მიმდინარეობს. შესაბამისად, მნიშვნელოვანია, რომ ახალ სპორტულ დარბაზებში დასაქმებულ კვალიფიცირებულ მწვრთნელებს სათანადო ანაზღაურება ჰქონდეთ“, - განაცხადა სამუშაო ჯგუფის წევრმა, სპორტის კომიტეტის თავმჯდომარის პირველმა მოადგილემ შოთა ხაბარელმა.

სპორტისა და ფიზიკური აღზრდის სფეროს განვითარების ხელშემწყობი სამუშაო ჯგუფის შეხვედრაში სპორტის მინისტრის მოადგილე ირაკლი დოლაბერიძე, განათლების, მეცნიერებისა და ახალგაზრდობის სამინისტროს ეკონომიკური დეპარტამენტის უფროსი ლევან კერესელიძე, განათლების ხარისხის ეროვნული ცენტრის დირექტორის მოადგილე ქეთევან კობახიძე და პროფესიული განათლების ხარისხის უზრუნველყოფის სამსახურის უფროსი ნანი დალაქიშვილი მონაწილეობდნენ.